កម្លាំងកងរាជអាវុធហត្ថស្រុកឱរ៉ាល់ ចុះជួយសង្គ្រោះប្រជាពលរដ្ឋជាប់គាំងដោយទឹកជំនន់នៅខ្នងផ្សារ (Video inside)
13-07-2026 16:21
(កំពង់ស្ពឺ)៖ ក្រោមការយកចិត្តទុកដាក់ខ្ពស់របស់លោកឧត្តមសេនីយ៍ត្រី ម៉េង ស្រ៊ុន មេបញ្ជាការកងរាជអាវុធហត្ថខេត្តកំពង់ស្ពឺ នៅថ្ងៃទី១៣ ខែកក្កដា ឆ្នាំ២០២៦ កម្លាំងជំនាញមូលដ្ឋានកងរាជអាវុធហត្ថស្រុកឱរ៉ាល់ បានចុះសហការជាមួយកម្លាំងជំនាញពាក់ព័ន្ធនានា ដើម្បីអន្តរាគមន៍ជួយចម្លងប្រជាពលរដ្ឋដែលជាប់គាំងនៅតំបន់ទឹកជន់លិច ក្នុងតំបន់ទេសចរណ៍ខ្នងផ្សារ ស្រុកឱរ៉ាល់ ខេត្តកំពង់ស្ពឺ ឲ្យមកកាន់ទីទួលមានសុវត្ថិភាព។
សកម្មភាពជួយអន្តរាគមន៍នេះបានធ្វើឡើងភ្លាមៗ បន្ទាប់ពីមានភ្លៀងធ្លាក់ជាប់ៗគ្នាបណ្តាលឲ្យកម្ពស់ទឹកនៅតំបន់មួយចំនួនក្នុងតំបន់ទេសចរណ៍ខ្នងផ្សារបានហក់ឡើងខ្ពស់ រហូតបង្កឲ្យប្រជាពលរដ្ឋមួយចំនួនដែលកំពុងធ្វើដំណើរ ឬស្នាក់នៅទីនោះត្រូវជាប់គាំងមិនអាចបន្តដំណើរបាន។ កម្លាំងចម្រុះបានប្រើប្រាស់មធ្យោបាយចាំបាច់ ដើម្បីជម្លៀសប្រជាពលរដ្ឋដោយសុវត្ថិភាព និងបានផ្តល់ការណែនាំពីវិធានការការពារខ្លួនពីគ្រោះថ្នាក់ផ្សេងៗ។
លោកឧត្តមសេនីយ៍ត្រី ម៉េង ស្រ៊ុន ក៏បានអំពាវនាវបងប្អូនប្រជាពលរដ្ឋ ក៏ដូចជាភ្ញៀវទេសចរណ៍ជាតិ-អន្តរជាតិ ដែលនិយមចូលចិត្តធ្វើដំណើរកម្សាន្តតាមតំបន់ព្រៃភ្នំ ជាពិសេសនៅតាមភ្នំក្នុងស្រុកឱរ៉ាល់ សូមមេត្តាបង្កើនការប្រុងប្រយ័ត្នឲ្យបានខ្ពស់បំផុត។
ការអំពាវនាវនេះធ្វើឡើង ខណៈពេលមេឃកំពុងតែមានភ្លៀងធ្លាក់ជាបន្តបន្ទាប់ ដែលអាចបណ្តាលឲ្យកម្ពស់ទឹកហក់ឡើងខ្ពស់ជាយថាហេតុ និងអាចបង្កឲ្យមានគ្រោះថ្នាក់ដល់អាយុជីវិត។ ការយកចិត្តទុកដាក់របស់អាជ្ញាធរ និងកម្លាំងមានសមត្ថកិច្ច គឺដើម្បីធានាបាននូវសុវត្ថិភាពជូនប្រជាពលរដ្ឋ និងភ្ញៀវទេសចរណ៍គ្រប់រូប៕
