(កោះកុង)៖ ដោយសហការជាមួយរដ្ឋបាលខេត្តកោះកុង វេទិកាសម្ព័ន្ធសង្គមស៊ីវិល (វ.ស.ស.) នៃទីស្តីការ​​គណៈ​រដ្ឋមន្រ្តី បានរៀបចំ​វេទិកាសន្ទនា ក្រោមប្រធានបទស្ដីពី​ «ការពង្រឹងសមត្ថភាពអង្គការសង្គមស៊ីវិលក្នុងយុគសម័យ​ឌីជីថល» ដែលបានប្រព្រឹត្តទៅនាព្រឹកថ្ងៃទី៦ ខែសីហា ឆ្នាំ២០២៦ នៅខេត្តកោះកុង ក្រោមអធិបតីភាពលោក ប៉ៃ សំបូរ​ អគ្គលេខាធិការ ​នៃអគ្គលេខាធិការដ្ឋាន​​ វ.ស.ស. តំណាងលោក កឹមរ័ត្ន វិសិដ្ឋ នាយករង​​ខុទ្ទកាល័យសម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា រដ្ឋលេខាធិការទីស្តីការគណៈរដ្ឋមន្រ្តី និងជាប្រធានក្រុមប្រឹក្សា​​​ភិបាល វ.ស.ស. និងលោក ហាក់ ឡេង អភិបាលរងខេត្តកោះកុង តំណាងលោកស្រី ឈី វ៉ា អភិបាលខេត្តកោះកុង ដោយ​មានការអញ្ជើញចូលរួម​ពីតំណាង​អង្គការ​​សង្គមស៊ីវិលក្នុងខេត្ត​កោះកុង និងអាជ្ញាធរមូលដ្ឋានជាច្រើននាក់។

ថ្លែងក្នុងពិធីបើកអង្គវេទិកានាព្រឹកនេះ លោក​អគ្គលេខាធិការ វ.ស.ស. បាន​លើកទឹកចិត្ត​ឱ្យអង្គការសង្គមស៊ីវិល​ខេត្តកោះកុងចូលរួមជាមួយរាជរដ្ឋាភិបាល ក្នុងការទប់ស្កាត់ព័ត៌មានក្លែងក្លាយក្នុងសហគមន៍ និងការលើកកម្ពស់ បរិវត្តកម្មឌីជីថល​ក្នុងសហគមន៍​ ដើម្បីជំរុញ​ការកសាង​​សង្គមឌីជីថលនៅកម្ពុជា ស្របតាមគោលនយោបាយ និងយុទ្ធសាស្រ្ត​អភិវឌ្ឍន៍ជាតិរបស់រាជរដ្ឋាភិបាល នីតិកាលទី៧ នៃរដ្ឋសភា ក្រោមការដឹកនាំ​ប្រកបដោយគតិបណ្ឌិតរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា។

លោកបានគូសបញ្ជាក់អំពីភាពចាំបាច់​ និងសារៈសំខាន់ ​នៃការយល់ដឹងអំពីសុវត្ថិភាព​តាម​ប្រព័ន្ធ​បច្ចេកវិទ្យា ដើម្បីពង្រឹងប្រសិទ្ធភាពការងារទំនាក់ទំនងប្រកបដោយសុវត្ថិភាពខ្ពស់។ ឆ្លៀតក្នុងឱកាសនេះដែរ លោក​ក៏បានលើកទឹកចិត្តឱ្យអង្គការសង្គមស៊ីវិលក្នុងមូលដ្ឋាន​ជួយផ្សព្វផ្សាយជំរុញឱ្យ​យុវជនយកចិត្តទុក​ដាក់លើការពង្រឹងសមត្ថភាពវិជ្ជាជីវៈរបស់ខ្លួន ដោយអាចពិចារណាចូលរៀនវគ្គបណ្តុះបណ្តាលបច្ចេកទេស​និងវិជ្ជាជីវៈនៅ​វិទ្យាស្ថាន​ជាតិពហុបច្ចេកទេសខេត្តកោះកុង ដើម្បីទទួលបានឱកាសការងារកាន់តែល្អប្រសើរនៅតាមក្រុមហ៊ុន សហគ្រាសក្នុងមូលដ្ឋាន ដែលអាចជួយលើកកម្ពស់ជីវភាពរស់នៅកាន់តែល្អប្រសើរ។

ក្នុងឱកាសនោះលោក ហាក់ ឡេង បានជម្រាបជូនអង្គប្រជុំអំពីអាទិភាពគន្លឹះទាំង៥ ក្នុងយុទ្ធសាស្ត្របញ្ចកោណ ដំណាក់កាលទី១ «មនុស្ស ផ្លូវ ទឹក ភ្លើង និងបច្ចេកវិទ្យា» ដើម្បីជំរុញកំណើនសេដ្ឋកិច្ច ការបង្កើតការងារ សមធម៌ ប្រសិទ្ធភាព និងចីរភាព។

លោកបានបន្ថែមថា បច្ចេកវិទ្យាទំនើបនាពេលបច្ចុប្បន្នអាចជួយសម្រួលដល់​ប្រសិទ្ធភាពការងារនិងទំនាក់ទំនងជាមួយគ្នាទៅវិញទៅមក ហើយក៏អាចបង្ក​នូវភាពងាយរងគ្រោះពីការឆបោកតាមប្រព័ន្ធឌីជីថលតាមគ្រប់រូបភាព​ពីសំណាក់ជនខិលខូចផងដែរ ដែលទាមទារ​ឱ្យអ្នកប្រើប្រាស់ត្រូវមានការប្រុងប្រយ័ត្នខ្ពស់។ ជាមួយគ្នានេះដែរ លោកក៏បានលើកទឹកចិត្តដល់អង្គការសង្គមស៊ីវិល​ក្នុងខេត្តកោះកុងទាំងអស់ បន្តចូលរួម ​កាន់តែសកម្មថែម ទៀតជាមួយអាជ្ញាធរមូលដ្ឋាននិងស្ថាប័នពាក់ព័ន្ធ ក្នុងការជំរុញ​ការអភិវឌ្ឍសេដ្ឋកិច្ច សង្គមប្រកបដោយបរិយាបន្ន និងរួមគ្នាកសាងសុខដុមនីយកម្មសង្គមស៊ីវិលនៅកម្ពុជា។

ក្នុងឱកាសនោះ តំណាងអង្គការសង្គមស៊ីវិលក្នុងខេត្តកោះកុង​លើកឡើងនូវបញ្ហា​ប្រឈម ​និង​សំណូមពរមកជជែកពិភាក្សាដោយត្រង់ទៅត្រង់មកជាមួយអាជ្ញាធរមូលដ្ឋាន។ ជាលទ្ធផល បញ្ហា​ប្រឈម និង​​សំណូមពរ​​​មួយចំនួន ត្រូវបានរួមគ្នា​ដោះស្រាយជាក់ស្តែងក្នុងកិច្ច​ពិភាក្សាដោយផ្ទាល់នៅក្នុងអង្គវេទិកា ហើយបញ្ហា​សេសសល់​​មួយ​​ចំនួន​​ទៀត​ នឹងត្រូវ​យកទៅពិភាក្សា​លម្អិតជាមួយអាជ្ញាធរនិង​សមត្ថកិច្ច​​ពាក់ព័ន្ធ ដើម្បីរួមគ្នាស្វែងរកដំណោះស្រាយ។

នៅក្នុងអង្គវេទិកានេះដែរ លោក វ៉េង ពន្លឺ អ្នកស្រាវជ្រាវ នៃបណ្ឌិត្យសភា​​​បច្ចេកវិទ្យា​ឌីជីថលកម្ពុជា បានចូលរួមធ្វើ​បទបង្ហាញជូនដល់អង្គវេទិកាអំពី «ការយល់ដឹងអំពីអក្ខរកម្ម​ឌីជីថល និងសុវត្ថិភាព​តាម​ប្រព័ន្ធ​បច្ចេកវិទ្យា​សម្រាប់អង្គការសង្គមស៊ីវិល» ក្នុងគោលបំណងផ្សព្វផ្សាយឱ្យអង្គការសង្គមស៊ីវិល​និងអាជ្ញាធរមូលដ្ឋាន​បានឈ្វេង​យល់​អំពី​បរិវត្តកម្ម​​ឌីជីថល និងការយល់ដឹងអំពី​គោលនយោបាយសេដ្ឋកិច្ចនិងសង្គម​ឌីជីថលកម្ពុជា ២០២១-២០៣៥៕