(ក្រចេះ)៖ លោក ហឿ ស៊ីយ៉ែម ប្រធានក្រុមប្រឹក្សាខេត្តក្រចេះ បានអញ្ជើញចុះជួបសំណេះសំណាល សួរសុខទុក្ខ និងនាំយកអំណោយចែកជូនដល់ប្រជាពលរដ្ឋក្រីក្រជួបការលំបាក ចាស់ជរា ជនពិការ ស្ត្រីមេម៉ាយ និងស្ត្រីទើបសម្រាលកូន នៅក្នុងភូមិសិរីសុខា ឃុំថ្មអណ្តើក ស្រុកចិត្របុរី ខេត្តក្រចេះ កាលពីព្រឹកថ្ងៃទី០៦ ខែសីហា ឆ្នាំ២០២៦។

ក្នុងឱកាសនោះ លោកប្រធានក្រុមប្រឹក្សាខេត្ត បានសម្តែងនូវការព្រួយបារម្ភ និងការយកចិត្តទុកដាក់ខ្ពស់ចំពោះជីវភាពរស់នៅរបស់បងប្អូនប្រជាពលរដ្ឋ ព្រមទាំងបានចុះទៅដល់ផ្ទះសម្បែងផ្ទាល់ ដើម្បីសាកសួរអំពីសុខទុក្ខ ស្ថានភាពជីវភាព និងសុខភាពរបស់ប្រជាពលរដ្ឋ ពិសេសចាស់ជរា និងស្ត្រីទើបសម្រាលកូន ដោយបានផ្តល់ជាសម្ភារ និងថវិកាមួយចំនួន ដើម្បីជួយសម្រាលការលំបាកចំពោះមុខ។

ជាមួយគ្នានោះដែរ លោក ហឿ ស៊ីយ៉ែម ក៏បានអញ្ជើញចុះពិនិត្យមើលស្ថានភាពស្ពានឈើមួយកន្លែងនៅក្នុងភូមិសិរីសុខា ដែលកំពុងមានភាពទ្រុឌទ្រោម និងខូចខាត ដើម្បីរកដំណោះស្រាយក្នុងការជួសជុល ឬកសាងឡើងវិញ សំដៅសម្រួលដល់ការធ្វើដំណើរ និងការដឹកជញ្ជូនកសិផលរបស់ប្រជាពលរដ្ឋនៅក្នុងមូលដ្ឋានឱ្យបានសុវត្ថិភាព និងទាន់ពេលវេលា។

ការយកចិត្តទុកដាក់នេះបានឆ្លុះបញ្ចាំងពីការប្តេជ្ញាចិត្តរបស់អាជ្ញាធរក្នុងការលើកកម្ពស់សុខុមាលភាព និងហេដ្ឋារចនាសម្ព័ន្ធមូលដ្ឋានសម្រាប់ប្រជាពលរដ្ឋ។ ប្រជាពលរដ្ឋនៅក្នុងភូមិសិរីសុខា បានសម្តែងនូវក្តីរំភើប និងថ្លែងអំណរគុណយ៉ាងជ្រាលជ្រៅចំពោះការយកចិត្តទុកដាក់របស់លោកប្រធានក្រុមប្រឹក្សាខេត្ត និងក្រុមការងារ៕