(ភ្នំពេញ)៖ លោកស្រីបណ្ឌិត សឿ សុជាតា អនុរដ្ឋលេខាធិការតំណាងលោកឧបនាយករដ្ឋមន្ត្រី ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា នាថ្ងៃទី០១ ខែតុលា ឆ្នាំ២០២៦នេះ បានអញ្ជើញជាអធិបតីប្រកាសជ័យលាភីការប្រកួតស្នាដៃផលិតវីដេអូអប់រំរបស់យុវជន ស្តីពីផលប៉ះពាល់នៃការប្រើប្រាស់គ្រឿងស្រវឹង ដែលបានរៀបចំឡើងនៅមជ្ឈមណ្ឌលគរុកោសល្យភូមិភាគរាជធានីភ្នំពេញ។

ពិធីនេះដែរក៏មានការចូលរួមពីលោកស្រី ឆាយគឹម សុទ្ធាវី ប្រធាននាយករដ្ឋានសុខភាពសិក្សាលោកវេជ្ជបណ្ឌិត មុំ គង់ ប្រធានអង្គការចលនាដើម្បីសុខភាពកម្ពុជា និងមានតំណាងមកពីក្រសួងអប់រំ យុវជន និងកីឡា តំណាងមកពីក្រសួងសុខាភិបាល តំណាងអង្គការសុខភាពពិភពលោកប្រចាំកម្ពុជា រួមទាំងមាន យុវជន និងនិស្សិតមកពីតាមបណ្តាសាកលវិទ្យាល័យជាច្រើនទៀត។

សូមជម្រាបថា ការប្រកួតស្នាដៃផលិតវីដេអូអប់រំស្តីពីផលប៉ះពាល់នៃការប្រើប្រាស់គ្រឿងស្រវឹងនេះ មានយុវជនជាច្រើនបានផ្ញើវីដេអូចូលរួមប្រកួត។ កម្មរៀបចំឡើងក្រសួងអប់រំ សហការជាមួយអង្គការចលនាដើម្បីសុខភាពកម្ពុជា ហើយនៅក្នុងវគ្គផ្តាច់ព្រ័ត្រនៃការប្រកួតផលិតវីដេអូនេះ មានបេក្ខជនចំនួន៤ក្រុម បានឡើងបង្ហាញសមត្ថភាព នៅចំពោះមុខគណៈកម្មការផ្តល់ពិន្ទុ និងអ្នកចូលរួមជាច្រើននាក់។

ថ្លែងនាឱកាសនោះលោកស្រីបណ្ឌិត សឿ សុជាតា បានបញ្ជាក់ឱ្យដឹងថា ដំណើរការនៃការអភិវឌ្ឍជាតិនាពេលបច្ចុប្បន្ននេះ យើងបានសង្ឃឹមទាំងអស់គ្នា និងបានធ្វើដំណើរប្រកបទៅដោយទស្សនៈរួមគ្នា ក្នុងការបង្កើតប្រទេស និងអភិវឌ្ឍឲ្យក្លាយទៅជាប្រទេសដែលមានចំណូលមធ្យមកម្រិតខ្ពស់នាឆ្នាំ២០៣០ និងជាប្រទេសអភិវឌ្ឍន៍នាឆ្នាំ២០៥០ ដំណើរការទាំងអស់នេះយេីងមិនអាចបដិសេធបានអំពីការចូលរួមរបស់ធនធានមនុស្សដែលជាយុវជននោះឡើយ។

លោកស្រីបណ្ឌិត សឿ សុជាតា បានបន្ថែមទៀត ដើម្បីឱ្យក្លាយជាធនធានមនុស្ស យុវជនត្រូវតែទទួលបានការការពារ ការណែនាំ និងការលើកកម្ពស់សមត្ថភាពសម្បទាទាំង ​៥ ផងដែរ ក្នុងនោះគឺ ចំណេះដឹងសម្បទា បំណិនសម្បទា កាយសម្បទា ចរិយាសម្បទា និងស្មារតីស្នេហាជាតិសម្បទា។

ជុំវិញការប្រកួតស្នាដៃផលិតវីដេអូអប់រំរបស់យុវជនស្តីពីផលប៉ះពាល់នៃការប្រើប្រាស់គ្រឿងស្រវឹង លោកស្រីបណ្ឌិត សឿ សុជាតា បានថ្លែងកោតសរសើរដល់ក្រុមយុវជន និងបានវាយតម្លៃខ្ពស់ដល់ក្រុមសិស្ស និស្សិត និងយុវជន ដែលបានខិតខំស្រាវជ្រាវ​ និងរួមគ្នាផលិតវីដេអូស្នាដៃនេះបានយ៉ាងល្អប្រសើរ និងបានចាត់ទុកស្នាដៃផលិតវីដេអូនេះជាការចូលរួមក្នុងសា្មរតីស្នេហាជាតិ និងដើម្បីចូលរួមអភិវឌ្ឍន៍ធនធានមនុស្សសម្រាប់សង្គមជាតិផងដែរ។

សូមបញ្ជាក់ដែរថា ក្រុមយុវជន និងនិស្សិតជ័យលាភីនៃប្រកួតស្នាដៃផលិតវីដេអូនេះលេខ១៖ ទទួលបានមេដាយជ័យលាភី ថវិកា ៣លាន ២០ម៉ឺនរៀល និងវិញ្ញាបនបត្របញ្ជាក់ជ័យលាភី, លេខ២៖ មេដាយជ័យលាភី ថវិកា ២លាន ៤០ម៉ឺនរៀល និងវិញ្ញាបនបត្របញ្ជាក់ជ័យលាភី, លេខ៣៖ មេដាយជ័យលាភី ថវិកា ១លាន ៦០ម៉ឺនរៀល និងវិញ្ញាបនបត្របញ្ជាក់ជ័យលាភី និងរង្វាន់លើកទឹកចិត្តលេខ៤ ទទួលបានថវិកា ៤០ម៉ឺនរៀល និងវិញ្ញាបនបត្របញ្ជាក់ការចូលរួម៕