លោក អោក សៀង បើកវេទិកាសាធារណៈនៅឃុំព្រះដាក់ ខេត្តសៀមរាប ដើម្បីដោះស្រាយសំណូមពរពលរដ្ឋ
05-11-2026 13:51
(សៀមរាប)៖ លោក អោក សៀង អគ្គនាយករង មជ្ឈមណ្ឌលជាតិគ្រប់គ្រងកងកម្លាំងរក្សាសន្តិភាពបោសសម្អាតមីន និងកាកសំណល់សង្គ្រាម និងជាប្រធានក្រុមការងាររាជរដ្ឋាភិបាល ចុះមូលដ្ឋានឃុំព្រះដាក់ ខេត្តសៀមរាប នៅថ្ងៃទី៥ ខែវិច្ឆិកា ឆ្នាំ២០២៦នេះ បានរៀបចំវេទិកាសាធារណៈនៅឃុំព្រះដាក់ ស្រុកបន្ទាយស្រី ដើម្បីដោះស្រាយសំណូមពរប្រជាពលរដ្ឋ និងជំរុញការផ្តល់សេវាអត្តសញ្ញាណប័ណ្ណចល័តជូនពលរដ្ឋ។
ពិធីនេះមានការអញ្ជើញចូលរួមពីមន្ត្រីរាជការ ព្រះសង្ឃ សិស្សានុសិស្ស យុវជន និងប្រជាពលរដ្ឋសរុប ៣០៥នាក់ (ស្រី១២៧នាក់) ដើម្បីពិភាក្សា និងដោះស្រាយបញ្ហាប្រឈមនានា។
វេទិកាសាធារណៈនេះ គឺជាឱកាសដ៏សំខាន់សម្រាប់ប្រជាពលរដ្ឋលើកឡើងនូវសំណូមពរ កង្វល់ និងបញ្ហាប្រឈមនានាដែលជួបប្រទះក្នុងជីវភាពរស់នៅ ដើម្បីឱ្យអាជ្ញាធរ និងស្ថាប័នពាក់ព័ន្ធទទួលយកទៅដោះស្រាយឱ្យបានទាន់ពេលវេលា និងមានប្រសិទ្ធភាព។
ជាមួយគ្នានេះ ការចុះធ្វើបច្ចុប្បន្នភាពអត្តសញ្ញាណប័ណ្ណសញ្ជាតិខ្មែរ បានផ្តល់ភាពងាយស្រួល ដល់ប្រជាពលរដ្ឋក្នុងការទទួលបានឯកសារផ្លូវច្បាប់សំខាន់មួយ ដែលចាំបាច់សម្រាប់ការប្រើប្រាស់សេវាសាធារណៈ ការបំពេញនីតិវិធីរដ្ឋបាល ការចុះឈ្មោះបោះឆ្នោត ការទទួលសេវាសុខាភិបាល ការអប់រំ និងការបំពេញប្រតិបត្តិការផ្សេងៗក្នុងជីវភាពប្រចាំថ្ងៃ។
លោកបានលើកឡើងថា ការរៀបចំវេទិកាសាធារណៈ និងការផ្តល់សេវារដ្ឋបាលដល់ប្រជាពលរដ្ឋនៅមូលដ្ឋាន គឺជាការអនុវត្តជាក់ស្តែងនូវគោលនយោបាយរបស់រាជរដ្ឋាភិបាល ក្នុងការនាំសេវាសាធារណៈឱ្យកាន់តែខិតជិតប្រជាពលរដ្ឋ ពង្រឹងអភិបាលកិច្ចល្អ លើកកម្ពស់តម្លាភាព គណនេយ្យភាព និងការចូលរួមរបស់ប្រជាពលរដ្ឋក្នុងការអភិវឌ្ឍមូលដ្ឋាន។
នៅក្នុងឱកាសនោះបងប្អូនប្រជាពលរដ្ឋដែលបានចូលរួមវេទិកាសាធារណៈ បានសម្តែងការគាំទ្រ និងវាយតម្លៃខ្ពស់ចំពោះការយកចិត្តទុកដាក់របស់រាជរដ្ឋាភិបាល ដែលបានចុះដល់មូលដ្ឋាន ដើម្បីស្តាប់មតិយោបល់ដោយផ្ទាល់ និងផ្តល់សេវាចាំបាច់ជូនប្រជាពលរដ្ឋ។
សកម្មភាពនេះ មិនត្រឹមតែជួយដោះស្រាយបញ្ហាប្រឈមជាក់ស្តែងប៉ុណ្ណោះទេ ប៉ុន្តែថែមទាំងរួមចំណែកពង្រឹងទំនុកចិត្តរវាងប្រជាពលរដ្ឋ និងរាជរដ្ឋាភិបាល ព្រមទាំងជំរុញការអភិវឌ្ឍសង្គម និងមូលដ្ឋានឱ្យកាន់តែមានចីរភាព។
ក្នុងឱកាសនោះ លោក អោក សៀង ក៏បានឧបត្ថម្ភថវិកា និងសម្ភារៈចំនួន ៩,៦៨៣,០០០រៀល ព្រមទាំងស្លាដក់៥ឈុត ជូនដល់អ្នកចូលរួម ព្រះសង្ឃ គណៈកម្មការវត្ត មន្ត្រីសុខាភិបាល កងកម្លាំងប្រដាប់អាវុធ នាយកសាលា សិស្សានុសិស្ស និងប្រជាពលរដ្ឋ ដើម្បីជាការលើកទឹកចិត្ត និងទ្រទ្រង់ដល់សកម្មភាពសង្គម។
វេទិកានេះបានទទួលសំណូមពរចំនួន ៨ចំណុច ដែលពាក់ព័ន្ធនឹងការឧបត្ថម្ភឯកសណ្ឋានប្រជាការពារ របងសាលាផ្ទះបាយសាលា អគារសិក្សា ដំបូលសាលាឆទាន ការសាងសង់ស្នាក់ការកងរាជអាវុធហត្ថ ការជួសជុលប៉ុស្តិ៍នគរបាលរដ្ឋបាល និងកាមេរ៉ាសុវត្ថិភាព ព្រមទាំងបណ្ណសមាជិកបក្ស ដែលមានតម្លៃសរុប ១៣,២៤៦ដុល្លារ។
រាល់សំណូមពរទាំងអស់ត្រូវបានក្រុមការងារឆ្លើយបំភ្លឺ និងសម្រេចដោះស្រាយជូនភ្លាមៗនៅក្នុងអង្គវេទិកា ដែលធ្វើឱ្យប្រជាពលរដ្ឋមានការពេញចិត្ត និងរំសាយនូវកង្វល់នានា។ ចំណុចនេះបង្ហាញពីការយកចិត្តទុកដាក់របស់រាជរដ្ឋាភិបាលក្នុងការបម្រើផលប្រយោជន៍ប្រជាពលរដ្ឋនៅមូលដ្ឋាន៕





































