សមាជិកក្រុមប្រឹក្សាខេត្តតាកែវ ចាត់ទុកការកសាងរូបបង្កង នឹងជួយទាក់ទាញភ្ញៀវទេសចរមកខេត្តតាកែវកាន់តែច្រើនឡើង
05-11-2026 15:17
(តាកែវ)៖ សមាជិកក្រុមប្រឹក្សាខេត្តតាកែវ បានសម្ដែងការសាទរចំពោះរដ្ឋបាលខេត្តតាកែវ ដែលបានកសាងសមិទ្ធផលថ្មីរូបសំណាកបង្កងបាញ់ទឹក នៅមាត់បឹងតាកែវ កណ្ដាលក្រុងដូនកែវ ដោយចាត់ទុកសមិទ្ធផលថ្មីនេះ បានជួយទាក់ទាញភ្ញៀវទេសចរជាតិ អន្តរជាតិ មកទស្សនាលេងកម្សាន្តក្នុងក្រុងដូនកែវ កាន់តែច្រើនជាពិសេសនឹងជួយលើកកម្ពស់ជីវភាពប្រជាពលរដ្ឋថែមទៀត។
ថ្លែងនៅក្នុងកិច្ចប្រជុំសាមញ្ញរបស់ក្រុមប្រឹក្សាខេត្តតាកែវ នៅសាលប្រជុំរដ្ឋបាលខេត្ត នាព្រឹកថ្ងៃទី៥ ខែវិច្ឆិកា ឆ្នាំ២០២៦ នៅចំពោះមុខគណៈអភិបាលខេត្ត និងមន្ទីរអង្គភាពជុំវិញខេត្តលោក ឡាយ សុខា សមាជិកក្រុមប្រឹក្សាខេត្តតាកែវ បានបញ្ជាក់ថា សមិទ្ធផលថ្មីរូបសំណាកបង្កងបាញ់ទឹក ដែលមានទីតាំងនៅបឹងតាកែវ ដែលរដ្ឋបាលខេត្តបានសម្ពោធកាលពីថ្ងៃទី៣០ ខែតុលាកន្លងទៅនេះ កំពុងមានភាពល្បីល្បាញយ៉ាងខ្លាំងនៅតាមបណ្ដាញសង្គម និងទទួលបានការចាប់អារម្មណ៍យ៉ាងខ្លាំងពីសាធារណជន ប្រជាពលរដ្ឋក្នុងខេត្ត និងក្រៅខេត្ត ពិសេសភ្ញៀវទេសចរជាតិ អន្តរជាតិបានមកលេងកម្សាន្ត ផ្ដិតយករូបភាពយ៉ាងច្រើនកុះករ។
លោកបន្ដថា តាមរយៈកំណើនទេសចរណ៍មកមើលរូបសំណាកបង្កងយ៉ាងច្រើនកុះករនេះ បានជួយបង្កើនសេដ្ឋកិច្ចខេត្ត ក៏ដូចជាលើកកម្ពស់កម្រិតជីវភាពប្រជាពលរដ្ឋ អាជីវករលក់បង្កង ប្រជានេសាទបង្កង តាមផ្ទៃបឹងក្នុងខេត្តតាកែវ ឲ្យមានជីវភាពល្អប្រសើរមួយកម្រឹតថែមទៀតជាក់ជាពុំខាន។
ក្នុងឱកាសនោះលោក វ៉ី សំណាង អភិបាលខេត្តតាកែវ បានលើកឡើងថា ការកសាងរូបសំណាកបង្កងបាញ់ទឹកនេះឡើង គឺដើម្បីបង្ហាញពីសក្តានុពលម្ហូបអាហារដ៏ល្បីល្បាញមួយប្រចាំខេត្តតាកែវ ក៏ដូចជាបង្កើតជាសោភ័ណភាពក្នុងក្រុងដូនកែវ និងជាកន្លែងកម្សាន្តសម្រាប់ប្រជាពលរដ្ឋមូលដ្ឋាន ក៏ដូចជាភ្ញៀវទេសចរជាតិ និងអន្តរជាតិដែលអញ្ជើញមកទស្សនាកម្សាន្តខេត្តតាកែវ ថតរូបទុកជាអនុស្សាវរីយ៍ផងដែរ។
លោកអភិបាលខេត្ត បានថ្លែងបន្តថា ក្រៅពីរូបសំណាកបង្កង អាជ្ញាធរខេត្តកំពុងកែលំអរហេដ្ឋារចនាសម្ព័ន្ធ រួមមានផ្លូវថ្នល់ សួនច្បារ កសាងវេទិការអុំទូកនៅមាត់បឹង កសាងប្រាសាទនៅចំកណ្ដាលបឹងតាកែវ និងផ្លូវក្រវ៉ាត់បឹងដើម្បីធ្វើយ៉ាងណាឲ្យក្រុងដូនកែវ ដែលជាបេះដូងរបស់ខេត្តតាកែវក្លាយជាទីក្រុងទេសចរណ៍ សម្រាប់ទាក់ទាញភ្ញៀវទេសចរមកលេងកាន់តែច្រើនឡើងនាពេលអនាគត៕



















