(ប៉េកាំង)៖ ចំនួនប្រជាជនសរុបនៅប្រទេសចិន បានបន្តធ្លាក់ចុះកាលពីឆ្នាំ២០២៤ ពោលគឺជាការធ្លាក់ចុះ៣ឆ្នាំជាប់ៗគ្នា ហើយក្រុមអ្នកជំនាញបាននិយាយថា និន្នាការនេះ នឹងមានសន្ទុះកាន់តែលឿនថែមទៀត ក្នុងពេលប៉ុន្មានឆ្នាំខាងមុខ។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters នាថ្ងៃសុក្រ ទី១៧ ខែមករា ឆ្នាំ២០២៥។

ការិយាល័យជាតិស្ថិតិរបស់ចិន បាននិយាយថា ចំនួនប្រជាជនសរុបនៅក្នុងប្រទេសចិន បានធ្លាក់ចុះក្នុងចំនួន១.៣៩លាននាក់ គឺមកនៅ​ត្រឹម១.៤០៨ពាន់លាននាក់ កាលពីឆ្នាំ២០២៤ ធៀបនឹងចំនួន១.៤០៩ពាន់លាននាក់ កាលពីឆ្នាំ២០២៣។ ចំណែក ចំនួនកំណើតសរុបនៅប្រទេសចិន មាន៩.៥៤លាននាក់ នៅឆ្នាំ២០២៤ ធៀបនឹង៩.០២លាននាក់ កាលពីឆ្នាំ២០២៣ ខណៈចំនួន​មរណៈគឺ១០.៩៣លាននាក់ នៅឆ្នាំ២០២៤ ធៀបនឹង១១.១លាននាក់ កាលពីឆ្នាំ២០២៣។

គួរបញ្ជាក់ថា ចំនួនប្រជាជនសរុបនៅប្រទេសចិន បានបន្តធ្លាក់ចុះចាប់តាំងតែពីឆ្នាំ២០២២មក។ អត្រាកំណើតរបស់ចិន បានបន្តថយចុះ អស់រយៈពេលជាច្រើនទសវត្សរ៍ ដោយសារតែ គោលនយោបាយកូនទោល ឬ one child policy ដែលចិនបានអនុវត្តចាប់ពីឆ្នាំ១៩៨០ ដល់ឆ្នាំ២០១៥ បូករួមជាមួយ ការធ្វើនគរូបនីយកម្មយ៉ាងឆាប់រហ័ស។ កាលពីឆ្នាំ២០២៤ អាជ្ញាធរចិន បានដាក់ចេញនូវចំណាត់ការជាច្រើន ដែលមានគោលដៅព្យាយាមជំរុញអត្រាកំណើត ប៉ុន្តែក្រុមអ្នកជំនាញយល់ឃើញថា និន្នាការធ្លាក់ចុះនៃចំនួនប្រជាជនចិន នឹងនៅតែបន្ត ហើយទំនងជា នឹងកាន់តែលឿនថែមទៀត៕