(បេរូត)៖ ប្រមុខក្រុម Hezbollah ក្នុងប្រទេសលីបង់ លោក Naim Qassem បាននិយាយនៅថ្ងៃពុធ ទី៣០ ខែកក្កដាថាការអំពាវនាវឱ្យចលនារបស់លោករំសាយអាវុធគឺមានតែបម្រើផលប្រយោជន៍ឱ្យអ៉ីស្រាអែលតែប៉ុណ្ណោះ ខណៈសហរដ្ឋអាមេរិកបង្កើនការដាក់សម្ពាធឱ្យ Hezbollah រំសាយអាវុធ។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

ក្នុងសុន្ទរកថាតាមកញ្ចក់ទូរទស្សន៍ លោក Naim Qassem បានគូសបញ្ជាក់ដូច្នេះថា «អ្នកដែលអំពាវនាវឱ្យយើងរំសាយអាវុធ គឺមានន័យស្មើអំពាវនាវឱ្យយើងចុះចាញ់អ៉ីស្រាអែល... ដូច្នេះយើងនឹងមិនចុះចាញ់អ៉ីស្រាអែលនោះទេ ...ហើយអ្នកទាំងនោះទាំងនៅក្នុងស្រុក សកលលោក និងពិភពអារ៉ាប់ គឺគ្រាន់តែបម្រើផលប្រយោជន៍ឱ្យអ៉ីស្រាអែល»។

គួរបញ្ជាក់ថា សហរដ្ឋអាមេរិក បច្ចុប្បន្ន កំពុងជំរុញឱ្យរដ្ឋាភិបាលលីបង់ធ្វើការប្ដេជ្ញាចិត្តជាផ្លូវការចំពោះការរំសាយអាវុធរបស់ក្រុម Hezbollah មុននឹងកិច្ចចរចាអាចចាប់ផ្ដើមឡើងវិញ ដើម្បីបញ្ឈប់ប្រតិបត្តិការយោធារបស់អ៉ីស្រាអែលក្នុងប្រទេសលីបង់៕