(វ៉ាស៉ីនតោន)៖ ប្រធានាធិបតីអាមេរិក​ លោក ដូណាល់ ត្រាំ បាននិយាយកាលពីថ្ងៃពុធសប្តាហ៍នេះថា សហរដ្ឋអាមេរិកនឹងយកពន្ធ ១៥ភាគរយពីកូរ៉េខាងត្បូង នៅក្រោមកិច្ចព្រមព្រៀងថ្មី។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃព្រហស្បតិ៍ ទី៣១ ខែកក្កដា ឆ្នាំ ២០២៥។

លោក ត្រាំ បានលើបណ្តាញសង្គម Truth Social ដូច្នេះថា «ខ្ញុំរីករាយក្នុងការប្រកាសថា សហរដ្ឋអាមេរិក បានយល់ព្រមលើកិច្ចព្រមព្រៀងពាណិជ្ជកម្មពេញលេញមួយ ជាមួយកូរ៉េខាងត្បូង»។ លោក ត្រាំ បានឱ្យដឹងថា កូរ៉េខាងត្បូងព្រមវិនិយោគចំនួន ៣៥០ពាន់លានដុល្លារនៅអាមេរិក ក្នុងគម្រោងដែលលោកបានជ្រើសរើសផ្ទាល់ និងស​ម្រាប់ការទិញឧស្ម័នធម្មជាតិរាវ ក៏ដូចជាផលិតផលថាមពលផ្សេងៗទៀត គិតជាទឹកប្រាក់ ១០០ពាន់លានដុល្លារ។

បើតាម លោក Kim Yong-beom ប្រធានគោលនយោបាយនៃការិយាល័យប្រធានាធិបតីកូរ៉េខាងត្បូង នៅក្នុងការវិនិយោគចំនួន ៣៥០ពាន់លានដុល្លារនោះ ទឹកប្រាក់ ១៥០ពាន់លានដុល្លារគឺផ្តោតលើការផលិតនាវារួមគ្នា ខណៈ ២០០ពាន់លានដុល្លារទៀត ប្រើសម្រាប់បន្ទះឈីប ថាមពលនុយក្លេអ៊ែរ អាគុយ និងជីវសាស្ត្រ៕