(ស៉ីដនី)៖ នាយករដ្ឋមន្រ្តីអូស្រ្តាលី លោក Anthony Albanese បានឱ្យដឹងថា លោកបានពិភាក្សាអំពីវិបត្តិនៅតំបន់ហ្កាហ្សា ជាមួយនាយករដ្ឋមន្រ្តីអង់គ្លេស លោក Keir Starmer និងបានរំលឹកឡើងវិញនូវការគាំទ្ររបស់រដ្ឋាភិបាល ចំពោះដំណោះស្រាយរដ្ឋពីរ សម្រាប់អ៉ីស្រាអែល-ប៉ាឡេស្ទីន។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃព្រហស្បតិ៍ ទី៣១ ខែកក្កដា ឆ្នាំ ២០២៥។

ក្នុងសប្តាហ៍នេះ លោក Starmer បាននិយាយថា អង់គ្លេសមានផែនការទទួលស្គាល់រដ្ឋប៉ាឡេស្ទីន នៅខែកញ្ញាខាងមុខ នៅឯមហាសន្និបាទអង្គការសហប្រជាជាតិ។ ចំណែកអូស្រ្តាលី មិនទាន់បង្ហាញពីការសម្រេចចិត្តផ្លូវការណាមួយនៅឡើយទេ។ នៅក្នុងសេចក្តីថ្លែងការណ៍ លោក Albanese គ្រាន់តែបានលើកឡើងថា អូស្រ្តាលី និងអង់គ្លេស យល់ស្របគ្នាលើសារៈសំខាន់នៃការប្រើប្រាស់មតិអន្តរជាតិ ដើម្បីទទួលបានបទឈប់បាញ់ ការដោះលែងចំណាប់ខ្មាំងអ៉ីស្រាអែលដែលនៅសល់ និងជំរុញលំហូរជំនួយមនុស្ស។ ប្រទេសទាំងពីរ ក៏ចង់​ឱ្យមានការធានា​ថា ​ក្រុម​​ហាម៉ាសនឹង​មិន​មាន​តួនាទី​ក្នុង​រដ្ឋ​ប៉ាឡេស្ទីន​នាពេលអនាគតផងដែរ​។

គួរបញ្ជាក់ថា ក្រៅពីអង់គ្លេស កាណាដា ក៏មានគម្រោងទទួលស្គាល់រដ្ឋប៉ាឡេស្ទីន នៅឯមហាសន្និបាត UN ខណៈបារាំង និងប្រទេសលោកខាងលិច១៤ផ្សេងទៀត កំពុងអំពាវនាវឱ្យបណ្ដាប្រទេសនៅជុំវិញពិភពលោក ទទួលស្គាល់រដ្ឋប៉ាឡេស្ទីន៕