(កៀវ)៖ នៅថ្ងៃព្រហស្បតិ៍ ទី៣១ ខែកក្កដា រដ្ឋមន្រ្តីការបរទេសអ៊ុយក្រែន បានអំពាវឱ្យមានការដាក់សម្ពាធខ្លាំងក្លាបំផុត លើទីក្រុងមូស្គូ បន្ទាប់ពីការវាយប្រហារថ្មីចុងក្រោយរបស់រុស្ស៉ី ធ្វើឱ្យមនុស្ស ៦នាក់ស្លាប់នៅក្នុងរដ្ឋធានីកៀវ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន AFP។

លោក Andriy Sybiha បានសរសេរលើបណ្តាញសង្គម X ដូច្នេះថា «លោកប្រធានាធិបតី ត្រាំ មានសប្បុរស និងអត់ធ្មត់ណាស់កន្លងមក ជាមួយប្រធានាធីបតី ពូទីន ហើយព្យាយាមរកដំណោះស្រាយ»។ លោកបន្ថែមថា «លោក ពូទីន មិនខ្វល់អំពីការប៉ុនប៉ងដើម្បីឱ្យសង្រ្គាមបញ្ចប់ទៅនោះទេ ហើយចង់តែបំផ្លាញ និងសម្លាប់។ វាដល់ពេលធ្វើឱ្យគាត់ (ពូទីន) ឈឺចាប់ និងរងផលវិបាកពីជម្រើសរបស់គាត់»។

គួរបញ្ជាក់ថា តាមក្រុមមន្រ្តីអ៊ុយក្រែន ការវាយប្រហាររបស់រុស្ស៉ី បានបណ្តាលឱ្យមនុស្សយ៉ាងហោចណាស់ ៦នាក់ស្លាប់ នៅក្នុងការវាយប្រហារដោយដ្រូន និងមីស៉ីលលើ ២៧ទីតាំងនៃទីក្រុងកៀវ៕