(គូឡាឡាំពួ)៖ នៅថ្ងៃព្រហស្បតិ៍ ទី៣១ ខែកក្កដា នាយករដ្ឋមន្រ្តីម៉ាឡេស៉ី លោក Anwar Ibrahim បានប្រាប់ឱ្យដឹងថា ប្រធានាធិបតីអាមេរិក លោក ដូណាល់ ត្រាំ បានបញ្ជាក់ថា លោកនឹងធ្វើដំណើរមកចូលរួមកិច្ចប្រជុំកំពូលអាស៊ានដោយផ្ទាល់ នៅខែតុលាខាងមុខ។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

លោក Anwar បានថ្លែងប្រាប់សភាឥណ្ឌូណេស៉ីដូច្នេះថា «ខ្ញុំទើបតែមានឱកាសនិយាយជាមួយប្រធានាធិបតីអាមេរិក លោក ដូណាល់ ត្រាំ។ លោកប្រធានាធិបតីបានបញ្ជាក់ថា រូបលោកនឹងមកចូលរួមដោយផ្ទាល់ ក្នុងកិច្ចប្រជុំកំពូលអាស៊ានលើកទី៤៧ នៅខែតុលា»។ បើតាមលោក Anwar កិច្ចព្រមព្រៀងពាណិជ្ជកម្មជាមួយទីក្រុងវ៉ាស៉ីនតោន ក៏ត្រូវបានរំពឹងថានឹងប្រកាសនៅថ្ងៃសុក្រសប្តាហ៍នេះ។

គួរបញ្ជាក់ថា កិច្ចប្រជុំកំពូលអាស៊ាន នឹងរៀបចំឡើងនៅប្រទេសម៉ាឡេស៉ី ដែលជាប្រធានប្តូរវេនឆ្នាំនេះ នៅថ្ងៃទី២៦-២៨ ខែតុលា។ ក្រៅពីសហរដ្ឋអាមេរិក កិច្ចប្រជុំរយៈពេល៣ថ្ងៃនោះ ក៏នឹងមានការចូលរួមពីក្រុមមន្រ្តីជាន់ខ្ពស់មកពីចិន ជប៉ុន កូរ៉េខាងត្បូង និងឥណ្ឌា ផងដែរ៕