(កៀវ)៖ នៅថ្ងៃព្រហស្បតិ៍ ទី៣១ ខែកក្កដា ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី បាននិយាយថា ពិភពលោកគួរតែជំរុញឱ្យមាន «ការផ្លាស់ប្តូររបប» នៅក្នុងប្រទេសរុស្ស៉ី ដោយលើកហេតុផលថា បើពុំដូច្នោះទេ ប្រធានាធិបតីរុស្ស៉ី លោក វ៉្លាឌីមៀ ពូទីន នឹងនៅតែបន្តបង្កអស្ថិរភាពចំពោះបណ្តាប្រទេសជិតខាងខ្លួន។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

ថ្លែងក្នុងសន្និសីទសារព័ត៌មានមួយ នាឱកាសខួប៥០ឆ្នាំ គិតចាប់តាំងពីការចុះសន្ធិសញ្ញា Helsinki Final Act ស្តីពីការគោរពព្រំប្រទល់និងបូរណភាពទឹកដី លោក ហ្សេលេនស្គី បានលើកឡើងយ៉ាងដូច្នេះថា «ខ្ញុំជឿថារុស្ស៉ីអាចត្រូវជំរុញឱ្យបញ្ឈប់សង្រ្គាមនេះបាន។ រុស្ស៉ីជាអ្នកចាប់ផ្តើមវា ហេតុនេះក៏អាចត្រូវជំរុញឱ្យបិទបញ្ចប់វាវិញដែរ ប៉ុន្តែប្រសិនបើពិភពលោក មិនដាក់គោលដៅផ្លាស់ប្តូររបបនៅរុស្ស៉ីទេនោះ មានន័យថា ទោះបីក្រោយសង្រ្គាមចប់ក៏ដោយ ទីក្រុងមូស្គូ នឹងនៅតែបន្តព្យាយាមបង្កអស្ថិរភាពចំពោះបណ្តាប្រទេសជិតខាងខ្លួន ដដែល»។

គួរបញ្ជាក់ថា កាលពីខែកុម្ភៈ ឆ្នាំ២០២២ លោក ពូទីន បានបញ្ជាឱ្យកងទ័ពរុស្ស៉ីបើកការឈ្លានពានពេញទំហឹងចូលអ៊ុយក្រែន ខណៈសង្រ្គាមមកទល់ពេលនេះ បានបន្តអស់រយៈពេលជាង៣ឆ្នាំកន្លះ ហើយមិនទាន់មានពន្លឺថា នឹងអាចបិទបញ្ចប់ទៅវិញ ក្នុងពេលឆាប់ៗខាងមុខនេះឡើយ។ កាលពីថ្ងៃអង្គារសប្តាហ៍នេះ ប្រធានាធិបតីអាមេរិក លោក ដូណាល់ ត្រាំ បាននិយាយថា សហរដ្ឋអាមេរិក នឹងចាប់ផ្តើមដាក់ពន្ធគយខ្ពស់ រួមទាំងវិធានការផ្សេងៗទៀតលើរុស្ស៉ី ក្នុងរយៈពេល១០ថ្ងៃខាងមុខ ប្រសិនបើទីក្រុងមូស្គូ មិនអាចបង្កើតវឌ្ឍនភាពក្នុងការបញ្ចប់សង្រ្គាមនៅអ៊ុយក្រែន៕