(ហ្ស៊េរុយសាឡិម)៖ បេសកជនពិសេសរបស់សហរដ្ឋអាមេរិក លោក Steve Witkoff បានជួបនាយករដ្ឋមន្ត្រីអ៉ីស្រាអែល លោក Benjamin Netanyahu នៅថ្ងៃព្រហស្បតិ៍ ទី៣១ ខែកក្កដា ដើម្បីស្ដារ កិច្ចចរចាលើបទឈប់បាញ់ហ្កាហ្សាឡើងវិញ និងដោះស្រាយវិបត្តិមនុស្សធម៌មួយដែលបង្កឡើងដោយសង្រ្គាមរបស់អ៉ីស្រាអែលជាមួយក្រុមហាម៉ាស ក្នុងតំបន់ហ្កាហ្សាជាទីដែលអន្តរជាតិបានព្រមានពី គ្រោះទុរិភិក្សកំពុងកើតឡើង។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

លោក Steve Witkoff បានធ្វើដំណើរទៅដល់អ៉ីស្រាអែល ខណៈរដ្ឋាភិបាលរបស់លោក Netanyahu កំពុងប្រឈមមុខនឹងសម្ពាធពីអន្តរជាតិឱ្យបិទបញ្ចប់សង្រ្គាមជាមួយហាម៉ាស និងបញ្ឈប់ការរឹតត្បិត លើលំហូរចូលនៃជំនួយទៅក្នុងតំបន់ហ្កាហ្សា។ ក្រោយជំនួបរវាងលោក Witkoff និងលោក Netanyahu មន្ត្រីជាន់ខ្ពស់អ៉ីស្រាអែលម្នាក់បាននិយាយថាការយោគយល់គ្នាមួយរវាងអ៉ីស្រាអែល និងអាមេរិក បានលេចចេញជារូបរាង នោះគឺតម្រូវការចាំបាច់នៃការផ្លាស់ប្ដូរពីផែនការមួយដើម្បីដោះលែងចំណាប់ខ្មាំងមួយចំនួន ទៅជាផែនការមួយដើម្បីដោះលែងចំណាប់ខ្មាំងទាំងអស់ រំសាយអាវុធរបស់ហាម៉ាស និងរំសាយយោធាក្នុងតំបន់ហ្កាហ្សា។ តែមន្ត្រីអ៉ីស្រាអែលរូបនេះមិនបានបញ្ជាក់អ្វីលម្អិតនោះទេ។

គួរបញ្ជាក់ថា ភ្លាមៗក្រោយលោក Witkoff ធ្វើដំណើរទៅដល់អ៉ីស្រាអែល លោកប្រធានាធិបតីអាមេរិក ដូណាល់ ត្រាំ បានបង្ហោះលើបណ្ដាញ Truth Social «មធ្យោបាយដ៏លឿនបំផុតដើម្បីបិទបញ្ចប់ វិបត្តិមនុស្សធម៌នៅហ្កាហ្សា នោះគឺហាម៉ាសត្រូវតែចុះចាញ់ និងដោះលែងចំណាប់ខ្មាំងទាំងអស់»។ លោក Witkoff នឹងត្រូវធ្វើដំណើរទៅកាន់តំបន់ហ្កាហ្សានៅថ្ងៃសុក្រសប្ដាហ៍នេះ ដើម្បីត្រួតពិនិត្យលើ ការចែកចាយស្បៀងអាហារ៕