(តូក្យូ)៖ រដ្ឋមន្ត្រីការបរទេសជប៉ុន លោក Takeshi Iwaya នៅថ្ងៃសុក្រ ទី១ ខែសីហា បាននិយាយថាជប៉ុនមានការព្រួយបារម្ភថាផែនការរៀបចំការបោះឆ្នោតរបស់មីយ៉ាន់ម៉ាដោយមិនមានការដោះលែង អ្នកដែលកំពុងជាប់ឃុំ អាចនឹងបង្កឱ្យមានការប្រឆាំងជំទាស់រឹតតែខ្លាំងឡើងពីប្រជាជន និងបង្កការលំបាកដល់ការស្វែងរកដំណោះស្រាយដោយសន្តិវិធី។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

លោក Iwaya បានគូសបញ្ជាក់នៅក្នុងសេចក្ដីថ្លែងការណ៍មួយថា «ជប៉ុនជាថ្មីម្ដងទៀតសូមជំរុញយ៉ាងខ្លាំងឱ្យយោធាមីយ៉ាន់ម៉ា បញ្ឈប់អំពើហិង្សាជាបន្ទាន់ ដោះលែងអ្នកដែលកំពុងជាប់ឃុំ ក្នុងនោះរួមមានទាំងអតីតមេដឹកនាំ លោកស្រី Aung San Suu Kyi ព្រមទាំងស្ដារប្រព័ន្ធនយោបាយប្រជាធិបតេយ្យមួយឡើងវិញ»។

ការអត្ថាធិប្បាយរបស់លោក Iwaya កើតមានឡើងមួយថ្ងៃ បន្ទាប់ពីយោធាមីយ៉ាន់ម៉ាបានលុបចោលការដាក់ប្រទេសក្នុងគ្រាអាសន្ន ដើម្បីពង្រឹងការត្រៀមលក្ខណៈសម្រាប់រៀបចំការបោះឆ្នោតសកល នៅអំឡុងចុងឆ្នាំនេះ ជាការបោះឆ្នោតដែលប្រឈមពហិការពីសំណាក់​ក្រុមប្រឆាំង និងរងការរិះគន់ពីក្រុមអ្នកអង្កេតការណ៍អន្តរជាតិ៕