(វ៉ាស៊ីនតោន)៖ ប្រធានាធិបតីអាមេរិក លោក ដូណាល់ ត្រាំ នៅថ្ងៃព្រហស្បតិ៍ ទី៣១ ខែកក្កដា បានរិះគន់ធ្ងន់ៗលើសកម្មភាពរបស់រុស្ស៉ីដែលលោកផ្ទាល់ចាត់ទុកថាអាក្រក់ហួសថ្លែងប្រឆាំងនឹងអ៊ុយក្រែន ហើយនិយាយថាលោកមានគម្រោងដាក់ទណ្ឌកម្មលើទីក្រុងមូស្គូ ប្រសិនបើមិនមានការឈានដល់កិច្ចព្រមព្រៀងបញ្ចប់សង្រ្គាមទេនោះ។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

ថ្លែងទៅកាន់ក្រុមអ្នកសារព័ត៌មាននៅការិយាល័យពងក្រពើ លោក ត្រាំ បានគូសបញ្ជាក់ថាលោកក៏មិនប្រាកដនោះដែរថាតើទណ្ឌកម្មអាចនឹងកំញើញរុស្ស៉ីបានឬក៏អត់? លោក ត្រាំ បានទុកពេលឱ្យលោក វ្ល៉ាឌីមៀ ពូទីន​ ប្រធានាធិបតីរុស្ស៉ី រហូតដល់ថ្ងៃទី៨ ខែសីហា ដើម្បីបិទបញ្ចប់សង្រ្គាមរបស់ខ្លួនជាមួយអ៊ុយក្រែន បើពុំដូច្នោះទេសហរដ្ឋអាមេរិកនឹងដាក់ទណ្ឌកម្មសេដ្ឋកិច្ចប្រឆាំងមូស្គូ។

គួរបញ្ជាក់ថា សហរដ្ឋអាមេរិកបានប្រាប់ក្រុមប្រឹក្សាសន្តិសុខអង្គការសហប្រជាជាតិ (UNSC) កាលពីថ្ងៃព្រហស្បតិ៍ ទី៣១ ខែកក្កដា ថាលោកប្រធានាធិបតី ដូណាល់ ត្រាំ ចង់បានកិច្ចព្រមព្រៀងមួយ ដើម្បីបិទបញ្ចប់សង្រ្គាមរបស់រុស្ស៉ីនៅអ៊ុយក្រែន ឱ្យបានមុនថ្ងៃទី៨ ខែសីហា៕