(ហ៊្សេរុយសាឡិម)៖ អ៉ីស្រាអែល បាននិងកំពុងជម្លៀសបុគ្គលិកការទូតភាគច្រើន ចេញពីអេមីរ៉ាត់អារ៉ាប់រួម ដោយប្រព័ន្ធផ្សព្វផ្សាយក្នុងស្រុកបានរាយការណ៍ នៅបន្ទាប់ពីក្រុមប្រឹក្សាសន្តិសុខជាតិអ៉ីស្រាអែល បានព្រមានពីការធ្វើដំណើរសម្រាប់ពលរដ្ឋរបស់ខ្លួន ដែលកំពុងស្នាក់​នៅ​ក្នុង​ប្រទេស​នៃតំបន់ឈូង​សមុទ្រមួយនេះ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃសុក្រ ទី១ ខែសីហា ឆ្នាំ ២០២៥។

នៅក្នុងសេចក្តីថ្លែងការណ៍របស់ខ្លួន ក្រុមប្រឹក្សាសន្តិសុខជាតិអ៉ីស្រាអែល គូសបញ្ជាក់ថា «យើងកំពុងសង្កត់ធ្ងន់ ជុំវិញការព្រមានអំពីការធ្វើដំណើរ ដោយសារតែមានដំណឹងថា អង្គការភេរវករ (អ៉ីរ៉ង់ ហាម៉ាស ហេសបូឡា និងក្រុមជីហាត) កំពុងបង្កើនកិច្ចខិតខំប្រឹងប្រែង ដើម្បីធ្វើបាបអ៉ីស្រាអែល»។ ក្រុមប្រឹក្សាសន្តិសុខជាតិអ៉ីស្រាអែល ព្រមានថាការប៉ុនប៉ងដែលអាចមាន កំណត់គោលដៅលើបុគ្គលជនជាតិអ៉ីស្រាអែល និងជនជាតិជ្វីហ្វនៅក្នុង UAE ពិសេសអំឡុងថ្ងៃឈប់សម្រាករបស់ជនជាតិជ្វីហ្វ និង Shabbat។ ភ្លាមៗនៅមិនទាន់មានការបញ្ជាក់ពីក្រសួងការបរទេសអ៉ីស្រាអែល និងអេមីរ៉ាត់អារ៉ាប់រួមនោះទេ។

គួរបញ្ជាក់ថា សហគមន៍អ៉ីស្រាអែល និងពលរដ្ឋជ្វីហ្វនៅអេមីរ៉ាត់អារ៉ាប់រួម ត្រូវបានគេមើលឃើញថាមានវត្តមានកាន់តែច្រើន ចាប់តាំងពីឆ្នាំ ២០២០ នៅពេលដែលអេមីរ៉ាត់អារ៉ាប់រួម មានបំណងបង្កើតទំនាក់ទំនងផ្លូវការជាមួយអ៉ីស្រាអែល ក្រោមកិច្ចព្រមព្រៀងសម្របសម្រួលដោយសហរដ្ឋអាមេរិក៕