(កៀវ)៖ ក្រសួងមហាផ្ទៃអ៊ុយក្រែន បានឱ្យដឹងថា តួលេខមនុស្សស្លាប់ ដោយសារការវាយប្រហារមីស៉ីលនិងដ្រូនរបស់រុស្ស៉ី មកលើទីក្រុងកៀវកាលពីថ្ងៃព្រហស្បតិ៍ ទី៣១ ខែកក្កដា បានកើនដល់២៦នាក់ ក្នុងនោះរួមមានកុមារ៣នាក់។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

តួលេខខាងលើបានកើនឡើង បន្ទាប់ពីក្រុមអ្នកសង្រ្គោះយកបានសាកសព១០នាក់ទៀត ចេញពីក្រោមគំនរបាក់បែកនៃអគារស្នាក់នៅ១កន្លែងក្នុងសង្កាត់ Sviatoshynsky។ មិនតែប៉ុណ្ណោះ ការវាយប្រហារកាលពីថ្ងៃព្រហស្បតិ៍ ក៏បានបង្កឱ្យមនុស្ស១៥៩នាក់ទៀត ក្នុងនោះមានកុមារ១៦នាក់ រងរបួសថែមទៀតផង។ រីឯនៅថ្ងៃសុក្រនេះ មនុស្សម្នាក់បានត្រូវរាយការណ៍ថាស្លាប់ ក្នុងការវាយប្រហាររបស់រុស្ស៉ី លើតំបន់ Zaporizhzhia នៅភាគអាគ្នេយ៍អ៊ុយក្រែន។

គួរបញ្ជាក់ថា ភ្លាមៗក្រោយការវាយប្រហារកាលពីថ្ងៃព្រហស្បតិ៍ ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី បានទទូចឱ្យ​សម្ព័ន្ធមិត្តរបស់ខ្លួន ជំរុញឱ្យមាននូវអ្វីដែលលោកហៅថា «ការផ្លាស់ប្តូររបប» ក្នុងប្រទេសរុស្ស៉ី។ នៅថ្ងៃដដែល ប្រធានាធិបតីអាមេរិក លោក ដូណាល់ ត្រាំ បានថ្កោលទង្វើរបស់រុស្ស៉ីនៅអ៊ុយក្រែនថា អាក្រក់ហួសប្រមាណ ដែលជាសញ្ញាបង្ហាញថា ទីក្រុងវ៉ាស៉ីនតោន មុខជានឹងដាក់ទណ្ឌកម្មធ្ងន់ថ្មីបន្ថែមទៀតលើរុស្ស៉ី ប្រសិនបើមិនមានកិច្ចព្រមព្រៀងបញ្ចប់សង្រ្គាមឆាប់ៗ៕