(អ៉ីស្លាម៉ាបាដ)៖ កាលពីថ្ងៃព្រហស្បតិ៍ ទី៣១ ខែកក្កដា តុលាការប្រឆាំងភេរវកម្មនៅប្រទេសប៉ាគីស្ថាន បានសម្រេចផ្តន្ទាទោស​ដាក់ពន្ធនាគារសមាជិកច្រើនជាង១០០នាក់ នៃគណបក្សរបស់អតីតនាយករដ្ឋមន្រ្តី លោក Imran Khan ក្រោមបទចោទប្រកាន់​ពាក់ព័ន្ធទៅនឹង ការធ្វើកុបកម្មកំណត់គោលដៅលើទីតាំងយោធា កាលពីឆ្នាំ២០២៣។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។

ក្នុងចំណោមមនុស្សជាង១០០នាក់ខាងលើ គឺ៥៨នាក់ ដែលរួមមានទាំងមន្រ្តីជាន់ខ្ពស់ និងសមាជិកសភារបស់គណបក្សប្រឆាំង Pakistan Tehreek-e-Insaf (PTI) ត្រូវបានកាត់ឱ្យជាប់ពន្ធនាគារ១០ឆ្នាំ ខណៈក្រៅពីនោះ គឺត្រូវបានផ្តន្ទាទោសឱ្យជាប់​ចន្លោះចាប់ពី១ឆ្នាំ ដល់៣ឆ្នាំ។

រដ្ឋាភិបាលប៉ាគីស្ថាន បានចោទប្រកាន់លោក Khan និងថ្នាក់ដឹកនាំដទៃទៀត ថាបានញុះញង់ឱ្យមានកុបកម្មកាលពីថ្ងៃទី៩ ខែឧសភា ឆ្នាំ២០២៣ ដែលអំឡុងពេលនោះ ក្រុមអ្នកតវ៉ាបាននាំគ្នាវាយប្រហារលើអគាររដ្ឋាភិបាល និងទីតាំងយោធា រួមមានទាំង​ទីស្នាក់ការកណ្តាលរបស់កងទ័ព នៅទីក្រុង Rawalpindi។

គួរបញ្ជាក់ថា លោក Khan ខ្លួនឯងផ្ទាល់ បាននិងកំពុងជាប់ពន្ធនាគារ ចាប់តាំងតែពីឆ្នាំ២០២៣មក ដោយប្រឈមបទចោទដូចជា ពុករលួយ ឆបោកដីធ្លី និងធ្វើឱ្យបែកធ្លាយកិច្ចការសម្ងាត់រដ្ឋ ហើយរូបលោកក៏កំពុងស្ថិតក្រោមការជំនុំជម្រះក្តីដាច់ដោយឡែក ក្រោមបទចោទប្រកាន់ស្រដៀងគ្នា ពាក់ព័ន្ធទៅនឹងកុបកម្មឆ្នាំ២០២៣ ផងដែរ។ គណបក្ស PTI គ្រោងរៀបចំការធ្វើបាតុកម្មថ្មីទៀត ចាប់ពីថ្ងៃទី៥ ខែសីហា ដែលជាខួប២ឆ្នាំនៃការជាប់ពន្ធនាគាររបស់លោក ដើម្បីទាមទារឱ្យដោះលែងលោក Khan៕