(មូស្គូ)៖ កាលពីថ្ងៃព្រហស្បតិ៍ ទី៣១ ខែកក្កដា ប្រមុខទីភ្នាក់ងារអវកាសរុស្ស៉ី បាននិយាយថា រូបលោកបានឯកភាពជាមួយ​សមភាគីរបស់លោក នៅទីភ្នាក់ងារអវកាស NASA អំឡុងកិច្ចពិភាក្សាជាមួយសហរដ្ឋអាមេរិក ដើម្បីបន្តប្រតិបត្តិការស្ថានីយអវកាសអន្តជាតិ (ISS) រហូតដល់ឆ្នាំ២០២៨។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

ក្នុងសប្តាហ៍នេះ ទីភ្នាក់ងារអវកាសរុស្ស៉ី Roscosmos បានឱ្យដឹងថា ប្រធានរបស់ខ្លួនគឺលោក Dmitry Bakanov បានទៅដល់​សហរដ្ឋអាមេរិក ដើម្បីបើកកិច្ចពិភាក្សាជាមួយប្រធានស្តីទីរបស់ NASA គឺលោក Sean Duffy ខណៈវាជាជំនួបលើកដំបូងបង្អស់ រវាងប្រធានទីភ្នាក់ងារអវកាសទាំងពីរ គិតចាប់តាំងពីឆ្នាំ២០១៨មក។

ស្ថានីយ ISS ត្រូវបានផ្តួចផ្តើមបង្កើតឡើងដោយអតីតសហភាពសូវៀត (រុស្ស៉ី) សហរដ្ឋអាមេរិក អឺរ៉ុប និងជប៉ុន ហើយដំណើរការសាងសង់ បានចាប់ផ្តើមកាលពីឆ្នាំ១៩៩៨។ ដំបូងឡើយ ស្ថានីយនេះត្រូវបានរំពឹងថា នឹងធ្វើប្រតិបត្តិការដល់​ត្រឹមឆ្នាំ២០២៤ប៉ុណ្ណោះ ប៉ុន្តែទីភ្នាក់ងារអវកាស​ NASA បាននិយាយថា វាអាចបន្តធ្វើប្រតិបត្តិការរហូតដល់ឆ្នាំ២០៣០។

គួរបញ្ជាក់ថា អវកាសស្ថិតក្នុងចំណោមវិស័យមួយចំនួនតូចចុងក្រោយ នៃកិច្ចសហប្រតិបត្តិការរវាងរុស្ស៉ីនិងសហរដ្ឋអាមេរិក ចំពោះមុខការដួលរលំសឹងតែទាំងស្រុង នៃទំនាក់ទំនងរវាងទីក្រុងមូស្គូ និងទីក្រុងវ៉ាស៉ីនតោន ដោយសារតែវិបត្តិសង្រ្គាមនៅអ៊ុយក្រែន។ ជាផ្នែកនៃការដាក់ទណ្ឌកម្មជាបន្តបន្ទាប់លើរុស្ស៉ី ចាប់តាំងពីទីក្រុងមូស្គូបានឈ្លានពានលើអ៊ុយក្រែន ក្រុមប្រទេសលោកខាងលិចជាច្រើន បានកាត់ផ្តាច់ទំនាក់ទំនងជាមួយទីភ្នាក់ងារអវកាស Roscosmos៕