(Chongqing)៖ សីតុណ្ហភាពបានហក់ឡើងដល់ ៤០អង្សាសេ នៅទីក្រុង Chongqing ស្ថិតនៅភាគនិរតីប្រទេសចិន ដែលជំរុញឱ្យអ្នកស្រុកខ្លះ ទប់ទល់នឹងអាកាសធាតុក្តៅខ្លាំង តាមវិធីច្នៃប្រឌិតផ្សេងៗ។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន Reuters នៅថ្ងៃសុក្រ ទី១ ខែសីហា ឆ្នាំ ២០២៥។

បន្ទាប់ពីសីតុណ្ហភាពមានកម្រិត ៤០អង្សាសេ ក្នុងរយៈពេលមួយសប្តាហ៍ ទីក្រុង Chongqing បានបង្កើនការព្រមានអំពីរលកកំដៅដល់កម្រិតខ្ពស់បំផុត ដែលជាការប្រកាសអាសន្នពណ៌ក្រហម កាលពីថ្ងៃព្រហស្បតិ៍។ ២១ស្រុកក្នុងចំណោម ៣៨ស្រុក ត្រូវបានព្យាករថា សីតុណ្ហភាពនឹងឡើងដល់ ៤៣អង្សាសេ និង ៤៤អង្សាសេនៅថ្ងៃអាទិត្យនេះ។

អ្នកស្រុកអាយុ ៦០ឆ្នាំម្នាក់ បាននិយាយាថា​ អាកាសធាតុ​​កាន់​តែ​ក្តៅ​ទៅៗ ហើយដើម្បីចៀសវាងកំដៅ គាត់បានចូលទៅហូបអាហារសម្រន់ជាមួយមិត្តភក្តិ ក្នុងចំណោមអ្នកចូលនិវត្តន៍ប្រហែល ១០០នាក់ នៅច្រកចូលរថភ្លើងក្រោមដី ពីព្រោះទីនោះមានម៉ាស៉ីនត្រជាក់។ ចំណែក​ លោកតា អាយុ ៧៩ឆ្នាំម្នាក់ បាននិយាយថា គាត់បានទៅហែលទឹកទន្លេ Yangtze ជាមួយមនុស្សជាច្រើនផ្សេងទៀត។ រីឯបុរសអាយុ ៣៦ឆ្នាំម្នាក់វិញ បានជ្រើសរើសការចូលទៅញ៉ាំ hotpot នៅភោជនីយដ្ឋានដ៏ចំណាស់មួយ ដែលមានខ្យល់អាកាសបែបធម្មជាតិ។

គួរបញ្ជាក់ថា Chongqing ល្បីល្បាញតាមអ៉ីនធឺណេត ថាជាទីក្រុងភោជនីយដ្ឋាន hotpot និងសម្រាប់ការថតរូប។ តាមប្រវត្តិសាស្ត្រ សម្រាប់ទីក្រុងដែលមានប្រជាជនជិត ៣២លាននាក់នេះ សីតុណ្ហភាពកម្រមានលើសពី ៣៩អង្សារសេ ក្នុងខែកក្កដាជាខែដែលក្តៅបំផុត៕