(បែរឡាំង)៖ នៅថ្ងៃសុក្រ​ ទី១ ខែសីហា អាល្លឺម៉ង់បាននិយាយថា ខ្លួននឹងប្រគល់ប្រព័ន្ធមីស៉ីលការពារដែនអាកាស Patriot ចំនួន២គ្រឿងឱ្យទៅអ៊ុយក្រែន បន្ទាប់ពីឈានដល់កិច្ចព្រមព្រៀងជាមួយសហរដ្ឋអាមេរិក។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។

រដ្ឋមន្រ្តីការពារជាតិអាល្លឺម៉ង់ លោក Boris Pistorius បាននិយាយថា ក្នុងពេលប៉ុន្មានថ្ងៃខាងមុខ យោធាអាល្លឺម៉ងនឹងចាប់ផ្តើម​ប្រគល់ប្រព័ន្ធបាញ់មីស៉ីលរបស់ Patriot ២គ្រឿងបន្ថែមទៅអ៊ុយក្រែន ហើយបន្ទាប់មកនឹងប្រគល់ប្រព័ន្ធគាំទ្រផ្សេងៗទៀតរបស់​ Patriot ក្នុងរយៈពេល២ឬ៣ខែខាងមុខ។ តាមរយៈការព្រមព្រៀងគ្នាជាមួយអាមេរិក ជាថ្នូរមកវិញ ទីក្រុងបែរឡាំងនឹងជាសម្ព័ន្ធមិត្តដំបូងគេ ដែលទទួលបាន​ប្រព័ន្ធ Patriot ស៊េរីទំនើបថ្មីចុងក្រោយបង្អស់ពីសហរដ្ឋអាមេរិក។ ប៉ុន្តែប្រព័ន្ធ Patriot ទាំងនោះ គឺអាល្លឺម៉ង់ផ្ទាល់ ជាអ្នករ៉ាប់រងចំណាយ។

គួរបញ្ជាក់ថា អ៊ុយក្រែនកំពុងត្រូវការសមត្ថភាពការពារដែនអាកាសជាចាំបាច់ ចំពោះមុខការវាយប្រហារឥតស្រាកស្រាន្ត និងកាន់តែខ្លាំងឡើងៗរបស់រុស្ស៉ី ខណៈប្រព័ន្ធ Patriot ត្រូវគេមើលឃើញច្បាស់ថា មានប្រសិទ្ធភាពខ្ពស់ក្នុងការបាញ់កម្ទេច​មីស៉ីលបាលិស្ទីគរបស់រុស្ស៉ី។ កន្លងមក អាល្លឺម៉ង់ធ្លាប់បានផ្តល់ Patriot របស់ខ្លួន៣គ្រឿងរួចហើយ ឱ្យអ៊ុយក្រែន៕