(ហាណូយ)៖ ប្រព័ន្ធផ្សព្វផ្សាយរដ្ឋបានរាយការណ៍នៅថ្ងៃសុក្រ ទី១ ខែសីហាថា ទឹកជំនន់បង្កឡើងដោយភ្លៀងធ្លាក់ខ្លាំង បណ្តាលឱ្យមនុស្ស ១៤នាក់ស្លាប់ ឬបាត់ខ្លួននៅខេត្ត Dien Bien ភាគខាងជើងប្រទេសវៀតណាម។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters។

កាសែត Tien Phong រាយការណ៍ថា ទឹកជំនន់បានហក់ឡើងយ៉ាងឆាប់រហ័ស នៅយប់ថ្ងៃព្រហស្បតិ៍ បន្ទាប់ពីភ្លៀងធ្លាក់ខ្លាំងជាច្រើនម៉ោង ដោយបានជន់លិចផ្ទះនៅតំបន់ទំនាប បណ្តាលឱ្យមានទឹកជំនន់ភ្លាមៗ និងការរអិលបាក់ដីនៅតំបន់ភ្នំនៃខេត្ត Dien Bien។ ភូមិ Xa Dung រងគ្រោះ​ធ្ងន់​ធ្ងរជាងគេ​ ដោយ​មាន​អ្នក​ស្លាប់​ម្នាក់ និង​បាត់​ខ្លួន ៦នាក់​។

​តាម​សេចក្តី​ថ្លែងការណ៍​របស់​គណៈកម្មាធិការ​ប្រជាជន​ខេត្ត​ ​បណ្តាញ​អគ្គិសនី​ និងចរាចរណ៍តភ្ជាប់ទៅ​កាន់​ផ្នែក​មួយ​ចំនួន​នៃ​ខេត្ត ត្រូវ​បាន​កាត់​ផ្តាច់​ដោយ​សារ​ទឹកជំនន់។ កុមារពីរនាក់នៅក្នុងភូមិ Hang Pu Xi ត្រូវកប់ក្នុងដីភក់ ហើយក្រុមអ្នកជួយសង្គ្រោះ មិនទាន់រកឃើញសាកសពពួកគេនៅឡើយទេ ខណៈដែលភ្លៀងធ្លាក់ខ្លាំងកំពុងរារាំង ដល់ការស្វែងរកអ្នកបាត់ខ្លួន៕