(តៃប៉ិ)៖ តៃវ៉ាន់ បានប្តេជ្ញាស្វែងរកការបញ្ចុះពន្ធគយ បន្ទាប់ពីលោក ដូណាល់ ត្រាំ ប្រធានាធិបតីអាមេរិក កំណត់ត្រឹមកម្រិត ២០ភាគរយជាបណ្តោះអាសន្ន លើការនាំចូលទៅកាន់សហរដ្ឋអាមេរិក។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃសុក្រ ទី១ ខែសីហា ឆ្នាំ ២០២៥។

មេដឹកនាំតៃវ៉ាន់ លោក Lai Ching-te និយាយថា «សហរដ្ឋអាមេរិក បានប្រកាសពន្ធបណ្តោះអាសន្នចំនួន ២០ភាគរយសម្រាប់តៃវ៉ាន់ ជាមួយនិងលទ្ធភាពនៃការកាត់បន្ថយថែមទៀត បើមានកិច្ចព្រមព្រៀងណាមួយ។ រដ្ឋាភិបាល នឹងបន្តខិតខំដើម្បីបានអត្រាពន្ធសមរម្យ និងបញ្ចប់ដំណាក់កាលចុងក្រោយនៃការចរចាពន្ធគយ»។

គួរបញ្ជាក់ថា តៃវ៉ាន់ ត្រូវបានលោក ត្រាំ ដាក់ពន្ធ ៣២ភាគរយ នៅក្នុងការប្រកាសកាលពីខែមេសា ហើយចាប់តាំងពីពេលនោះមក ទីក្រុងតៃប៉ិ និងទីក្រុងវ៉ាស៉ីនតោន បានរៀបចំកិច្ចពិភាក្សាទល់មុខគ្នា ៤លើក និងសន្និសីទតាមវីដេអូជាច្រើនដើម្បីដោះស្រាយ៕