វៀតណាម ប្តេជ្ញាបន្តការចរចាពាណិជ្ជកម្ម ក្រោយអាមេរិកបញ្ចុះពន្ធមកត្រឹម ២០ភាគរយ (Video inside)
01-08-2025 18:58
(ហាណូយ)៖ ក្រសួងឧស្សាហកម្ម និងពាណិជ្ជកម្មវៀតណាម បានប្រកាសនៅថ្ងៃសុក្រនេះថា វៀតណាមនឹងបន្តកិច្ចចរចាពាណិជ្ជកម្មជាមួយសហរដ្ឋអាមេរិក ដើម្បីឈានទៅបញ្ចប់កិច្ចព្រមព្រៀងពាណិជ្ជកម្មមួយ ដែលផ្អែកលើភាពបើកចំហ សមភាព និងការគោរពគ្នាទៅវិញទៅមក។ នេះបើយោងតាមការចេញផ្សាយដោយ ទីភ្នាក់ងារសារព័ត៌មានស៊ីនហួរ។
សេចក្តីប្រកាសនេះបានធ្វើឡើង បន្ទាប់ពីសហរដ្ឋអាមេរិកបានបញ្ចុះអត្រាពន្ធលើទំនិញវៀតណាមពី ៤៦% មកនៅត្រឹម ២០% វិញ ក្រោមបទបញ្ជាប្រតិបត្តិថ្មីមួយដែលបានចុះហត្ថលេខាដោយប្រធានាធិបតី ដូណាល់ ត្រាំ។ បទបញ្ជានេះបានកែប្រែអត្រាពន្ធសម្រាប់ដៃគូពាណិជ្ជកម្មចំនួន ៦៩។
គួរបញ្ជាក់ថា ចាប់តាំងពីខែមេសា ឆ្នាំ២០២៥ វៀតណាម និងសហរដ្ឋអាមេរិកបានចូលរួមក្នុងកិច្ចចរចាពាណិជ្ជកម្មកម្រិតខ្ពស់ និងបានបង្កើតវឌ្ឍនភាពលើបញ្ហាពន្ធគយ ពាណិជ្ជកម្មឌីជីថល និងវិស័យផ្សេងៗទៀត៕