(ប៊ែរឡាំង)៖ ក្រសួងការពារជាតិអាល្លឺម៉ង់បានប្រកាសនៅថ្ងៃសុក្រថា អាល្លឺម៉ង់នឹងបញ្ជូនប្រព័ន្ធការពារដែនអាកាស Patriot ចំនួន ២គ្រឿងទៅឲ្យអ៊ុយក្រែន បន្ទាប់ពីបានឈានដល់កិច្ចព្រមព្រៀងមួយជាមួយសហរដ្ឋអាមេរិក។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន​ Reuters នៅថ្ងៃទី០១ ខែសីហា ឆ្នាំ២០២៥។

យោងតាមសេចក្តីថ្លែងការណ៍ ប្រព័ន្ធបាញ់បង្ហោះ នឹងត្រូវបានបញ្ជូនទៅឲ្យអ៊ុយក្រែនក្នុងរយៈពេលប៉ុន្មានថ្ងៃខាងមុខនេះ ហើយសមាសភាគផ្សេងទៀតនៃប្រព័ន្ធនេះ នឹងត្រូវបានបញ្ជូនជាបន្តបន្ទាប់ក្នុងរយៈពេលពីរទៅបីខែខាងមុខ។

គួរបញ្ជាក់ថា នេះគឺជាកិច្ចព្រមព្រៀងដោះដូរមួយ។ ជាថ្នូរនឹងការផ្តល់ប្រព័ន្ធ Patriot ដល់អ៊ុយក្រែន អាល្លឺម៉ង់នឹងទទួលបានការបញ្ជូនប្រព័ន្ធ Patriot ផលិតថ្មីពីសហរដ្ឋអាមេរិកវិញយ៉ាងឆាប់រហ័ស។ រដ្ឋមន្ត្រីការពារជាតិអាល្លឺម៉ង់ លោក Boris Pistorius បានពន្យល់ថា ការធ្វើបែបនេះគឺដើម្បីធានាថាអាល្លឺម៉ង់អាច «បន្តបំពេញកាតព្វកិច្ចរបស់ខ្លួនចំពោះអង្គការណាតូបាន»៕