(ហ្គាហ្សា)៖ បេសកជនមជ្ឈិមបូព៌ារបស់ប្រធានាធិបតី ដូណាល់ ត្រាំ បានក្លាយជាមន្ត្រីជាន់ខ្ពស់អាមេរិកដំបូងគេដែលមកទស្សនាតំបន់ហ្គាហ្សាចាប់តាំងពីសង្គ្រាមបានចាប់ផ្តើម ដោយបានចុះត្រួតពិនិត្យប្រតិបត្តិការជំនួយមួយដែលគាំទ្រដោយសហរដ្ឋអាមេរិកនៅថ្ងៃសុក្រនេះ ដែលអង្គការសហប្រជាជាតិ (UN) បានចាត់ទុកថា ជាផ្នែកមួយដែលរួមចំណែកដល់ស្ថានភាពស្លាប់នៅក្នុងតំបន់នេះ។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន Reuters។

លោក Steve Witkoff បានចុះពិនិត្យទីតាំងមួយដែលដំណើរការដោយ មូលនិធិមនុស្សធម៌ហ្គាហ្សា (GHF) ដែលគាំទ្រដោយសហរដ្ឋអាមេរិក។ ប៉ុន្មានម៉ោងក្រោយដំណើរទស្សនកិច្ចរបស់លោក មន្ត្រីសុខាភិបាលប៉ាឡេស្ទីនបានរាយការណ៍ថា កងកម្លាំងអ៊ីស្រាអែលបានបាញ់សម្លាប់ជនជាតិប៉ាឡេស្ទីនចំនួន ៣នាក់នៅជិតទីតាំងមួយរបស់ក្រុមនេះ។

យោធាអ៊ីស្រាអែលបានអះអាងថា ខ្លួនបានបាញ់ព្រមានទៅលើអ្វីដែលខ្លួនហៅថាជា «ការប្រមូលផ្តុំជនសង្ស័យ» ដែលកំពុងចូលទៅជិតកងទ័ពរបស់ខ្លួន។

គួរបញ្ជាក់ថា អង្គការសហប្រជាជាតិបានបដិសេធមិនធ្វើការជាមួយ GHF នោះទេ ដោយបានបញ្ជាក់ថា មនុស្សជាង ១,០០០នាក់ត្រូវបានសម្លាប់ ខណៈកំពុងព្យាយាមទទួលជំនួយ ចាប់តាំងពី GHF បានចាប់ផ្តើមប្រតិបត្តិការកាលពីខែឧសភា ហើយភាគច្រើនត្រូវបានបាញ់សម្លាប់ដោយកងកម្លាំងអ៊ីស្រាអែល។ UN បានចាត់ទុកថា វិធីសាស្ត្ររបស់ GHF គឺមានគ្រោះថ្នាក់ និងរំលោភលើគោលការណ៍អព្យាក្រឹតភាពមនុស្សធម៌។ ទោះជាយ៉ាងណា GHF បានអះអាងថា គ្មាននរណាម្នាក់ត្រូវបានសម្លាប់នៅទីតាំងរបស់ខ្លួននោះទេ ហើយថាខ្លួនកំពុងធ្វើការងារបានល្អជាង UN ទៅទៀត។

លោក Witkoff ដែលបានពាក់មួក «ធ្វើឲ្យអាមេរិកអស្ចារ្យឡើងវិញ» បានថ្លែងថា ដំណើរទស្សនកិច្ចនេះគឺដើម្បីជួយលោក ត្រាំ រៀបចំផែនការជំនួយថ្មីមួយសម្រាប់ហ្គាហ្សា៕