(វ៉ាស៊ីនតោន)៖ រដ្ឋមន្ត្រីហិរញ្ញវត្ថុអាមេរិក លោក Scott Bessent បាននិយាយនៅថ្ងៃសុក្រ ទី១ ខែសីហា ថាលោកជឿជាក់ថាទីក្រុងវ៉ាស៊ីនតោន និងទីក្រុងប៉េកាំង កំពុងខិតជិតទៅ រកការសម្រេចបានដោយជោគជ័យនូវកិច្ចព្រមព្រៀងពាណិជ្ជកម្ម បន្ទាប់ពីកិច្ចចរចារយៈពេល២ថ្ងៃក្នុងទីក្រុង Stockholm។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

លោក Scott Bessent បានបង្ហោះលើបណ្ដាញទំនាក់ទំនងសង្គម X ថា «កិច្ចចរចាក្នុងសប្ដាហ៍នេះនៅទីក្រុង Stockholm បានជំរុញកិច្ចចរចារបស់យើងជាមួយចិន ហើយខ្ញុំជឿជាក់ថា យើងកំពុងខិតជិតទៅរកកិច្ចព្រមព្រៀងមួយដែលនឹងផ្ដល់ផលចំណេញដល់ប្រជាជាតិដ៏អស្ចារ្យរបស់យើងទាំង២។ ខ្ញុំមានសុទិដ្ឋិនិយមចំពោះការបោះជំហានឆ្ពោះទៅមុខ»។ ប៉ុន្តែបើតាម អ្នកនាំពាក្យម្នាក់នៃក្រសួងហិរញ្ញវត្ថុអាមេរិក ការបង្ហោះសារបែបនេះរបស់លោក Bessent ត្រូវបានលុបចោល និងត្រូវបានបង្ហោះសារជាថ្មីដោយសារកំហុសបច្ចេកទេស។

ក្រសួងហិរញ្ញវត្ថុអាមេរិកបន្ថែមថាខ្លឹមសារបង្ហោះរបស់លោក Bessent គឺឆ្លុះបញ្ចាំងពីអ្វីដែលលោកបានលើកឡើងនៅក្នុងបទសម្ភាសន៍ថ្មីៗនេះ។ ក្នុងបទសម្ភាសន៍ជាមួយ CNBC កាលពី ថ្ងៃព្រហស្បតិ៍សប្ដាហ៍នេះ លោករដ្ឋមន្ត្រីហិរញ្ញវត្ថុអាមេរិកបានទទួលស្គាល់ថាសហរដ្ឋអាមេរិកមើលឃើញពីភាពរីកចម្រើនក្នុងកិច្ចចរចា តែបានសង្កត់ធ្ងន់ថាកិច្ចព្រមព្រៀងមិនទាន់ សម្រេចបាន ១០០ភាគរយនោះទេ។

គួរបញ្ជាក់ថា ចិនកំពុងប្រឈមនឹងឱសានវាទពន្ធគយដែលនឹងត្រូវផុតកំណត់នៅថ្ងៃទី១២ ខែសីហា ហើយបើមិនមានកិច្ចព្រមព្រៀងពេញលេញមួយជាមួយលោកប្រធានាធិបតី ដូណាល់ ត្រាំទេ នោះប្រទេសទាំង២អាចនឹងវិលត្រឡប់ទៅរកការសងសឹកដំឡើងពន្ធដាក់គ្នាទៅវិញទៅមកសាជាថ្មី៕