(មូស្គូ)៖ ប្រធានាធិបតីរុស្ស៉ី លោក វ្ល៉ាឌីមៀ ពូទីន បាននិយាយកាលពីថ្ងៃសុក្រ ទី១ ខែសីហា ថារុស្ស៉ីបានចាប់ផ្ដើមផលិតមីស៊ីលល្បឿនលឿនជាងសំឡេង (hypersonic) ស៊េរីថ្មីរបស់ខ្លួន និងបញ្ជាក់ឡើងវិញពីផែនការដាក់ពង្រាយអាវុធទាំងនោះនៅលើទឹកដីបេឡារុសនៅក្នុងឆ្នាំនេះ។ នេះបើតាមការចេញផ្សាយដោយទីភ្នាក់ងារសារព័ត៌មាន AP។

ដោយអង្គុយជាប់ជាមួយប្រធានាធិបតីបេឡារុស លោក Alexander Lukashenko នៅលើកោះ Valaam ក្បែរទីក្រុង St. Petersburg លោក ពូទិន បានឱ្យដឹងថាយោធារុស្ស៉ីបានជ្រើសរើស រួចរាល់ហើយនូវទីតាំងនៅក្នុងប្រទេសបេឡារុសសម្រាប់ដាក់ពង្រាយមីស៊ីល Oreshnik។ «ការងាររៀបចំកំពុងដំណើរការ ហើយយើងអាចនឹងសម្រេចការងារនេះនៅមុនដំណាច់ឆ្នាំ២០២៥»។ នេះជាការគូសបញ្ជាក់របស់លោក ពូទីន ដោយបន្ថែមថាមីស៊ីល Oreshniks និងប្រព័ន្ធរបស់មីស៊ីលនេះមួយចំនួនត្រូវបានផលិតនិងដាក់ឱ្យយោធារុស្ស៉ីប្រើប្រាស់។

គួរបញ្ជាក់ថា រុស្ស៉ីបានប្រើប្រាស់មីស៊ីលល្បឿនលឿនជាងសំឡេង Oreshniks ជាលើកដំបូងក្នុងការវាយប្រហារលើអ៊ុយក្រែនកាលពីខែវិច្ឆិកា ឆ្នាំ២០២៤ ដោយបាញ់មីស៊ីលលើឃ្លាំងអាវុធ មួយរបស់អ៊ុយក្រែនៅក្នុងទីក្រុង Dnipro។ តាមលោក ពូទីន Oreshniks មានសមត្ថភាពបំពាក់ក្បាលគ្រាប់ច្រើនគ្រាប់ និងហោះក្នុងល្បឿនលឿនជាងសំឡេង១០ដង ហើយឥលូវជាអាវុធ គ្មានគូប្រៀប៕