(ហ្សាការតា)៖ ភ្នំភ្លើង Lewotobi Laki-laki ដែលស្ថិតនៅក្នុងចំណោមភ្នំភ្លើងដ៏សកម្ម ក្នុងប្រទេសឥណ្ឌូណេស៊ី បានផ្ទុះ២ថ្ងៃជាប់ៗគ្នា ដោយបញ្ចេញផ្សែង និងផេះ ទៅក្នុងអាកាសកម្ពស់ ១៨គីឡូម៉ែត្រ នៅព្រឹកថ្ងៃសៅរ៍ ទី២ ខែសីហា។ នេះបើតាមការចេញផ្សាយដោយទីភ្នាក់ងារសារព័ត៌មាន AP។

ការផ្ទុះកាលពីល្ងាចថ្ងៃសុក្រ Lewotobi Laki-laki បានបញ្ចេញផ្សែង និងផេះទៅក្នុងអាកាសកម្ពស់១០គីឡូម៉ែត្រ ហើយបញ្ចេញទាំងកម្អែភ្នំភ្លើងបង្កើតជាពន្លឺភ្លើង ជះពេញផ្ទៃអាកាស។ ទីភ្នាក់ងារភូគព្ភសាស្ដ្រឥណ្ឌូណេស៊ី បានឱ្យដឹងថាភ្នំភ្លើងនេះក៏បានឧស្ម័នទៅក្នុងអាកាស រួមទាំដុំថ្ម និងកម្អែភ្នំហូរ និងធ្លាក់ចុះពីភ្នំចម្ងាយ ៥គីឡូម៉ែត្រផងដែរ។ ប៉ុន្តែភ្លាមៗមិនទាន់មានសេចក្ដីរាយការណ៍ពីជនរងគ្រោះនោះទេ។

គួរបញ្ជាក់ថា ការផ្ទុះភ្នំភ្លើង Lewotobi Laki-laki នៅថ្ងៃសៅរ៍នេះ គឺស្ថិតក្នុងចំណោមការផ្ទុះភ្នំភ្លើងដ៏ខ្លាំងបំផុតមួយ ចាប់តាំងពីឆ្នាំ២០១០ ជាពេលដែលភ្នំភ្លើង Merapi នៅលើកោះជ្វា ផ្ទុះបញ្ចេញផ្សែង ផេះ និងកម្អែភ្នំភ្លើង ដែលបានសម្លាប់មនុស្សយ៉ាងហោច ៣៥០នាក់ និងបង្ខំឱ្យមនុស្សរាប់ម៉ឺននាក់ភៀសខ្លួនចេញពី ផ្ទះសម្បែង៕