(សេអ៊ូល)៖ កូរ៉េខាងជើង នៅថ្ងៃសៅរ៍ ទី២ ខែសីហា បានបង្ហាញក្ដីសង្ឃឹមសម្រាប់សន្តិភាពយូរអង្វែង និងស្ថិរភាពនៅក្នុងតំបន់អាស៊ីអាគ្នេយ៍ បន្ទាប់ពីកម្ពុជា និងថៃ ឈានដល់បទឈប់បាញ់ ដើម្បីឆ្ពោះទៅរកការបិទបញ្ចប់ជម្លោះព្រំដែនរវាងប្រទេសទាំង២។ នេះបើតាមការចេញផ្សាយដោយទីភ្នាក់ងារសារព័ត៌មានកូរ៉េខាងត្បូង Yonhap។

អ្នកនាំពាក្យម្នាក់នៃក្រសួងការបរទេសកូរ៉េខាងជើង ធ្វើការកត់សម្គាល់ខាងលើនៅក្នុងសេចក្ដីថ្លែងការណ៍មួយចេញផ្សាយដោយប្រព័ន្ធផ្សព្វផ្សាយរដ្ឋកូរ៉េខាងជើង KCNA នៅថ្ងៃសៅរ៍នេះ និងបន្ទាប់ពីបទឈប់បាញ់រវាងកម្ពុជា និងថៃ​ ចូលជាធរមានកាលពីម៉ោង១២យប់ថ្ងៃចន្ទដើមសប្ដាហ៍នេះ។ អ្នកនាំពាក្យរូបនេះបានគូសបញ្ជាក់ដូច្នេះថា «យើងសង្ឃឹមថាបណ្ដាប្រទេសក្នុងតំបន់អាស៊ីអាគ្នេយ៍ នឹងសម្រេចបាននូវសន្តិភាពយូរអង្វែង និងស្ថិរភាពនៅក្នុងតំបន់ តាមរយៈការបំភ្លេចចោលការខ្វែងគំនិតគ្នា និងការពង្រឹងទំនុកចិត្តខាងនយោបាយ ក៏ដូចជាលើកកម្ពស់កិច្ចសហប្រតិបត្តិការទ្វេភាគី»។

អ្នកនាំពាក្យក្រសួងការបរទេសកូរ៉េខាងជើង បន្ថែមថាបទឈប់បាញ់រវាងកម្ពុជា និងថៃ សម្រេចបានដោយសារតែកិច្ចប្រឹងប្រែងស្រឡាញ់សន្តិភាពពីបណ្ដាប្រទេសពាក់ព័ន្ធ និងអាស៊ាន ដើម្បីផ្សះផ្សាជម្លោះដោយសន្តិវិធីតាមរយៈកិច្ចសន្ទនា និងការទូត៕