(ញ៉ូវដេលី)៖​ ប្រភពពីរដ្ឋាភិបាលឥណ្ឌា​ចំនួនពីរ​បានប្រាប់​ Reuters ថាឥណ្ឌានឹងបន្តទិញប្រេងពីរុស្ស៉ី​ បើទោះបីជាប្រធានាធិបតីអាមេរិកលោក ដូណាល់ ត្រាំ គំរាមដាក់ទណ្ឌកម្មក៏ដោយ។ នេះបេីយោងតាមការចេញផ្សាយនៅថ្ងៃសៅរ៍​ ទី២​ ខែសីហា​ ឆ្នាំ​ ២០២៥។

ដោយសារតែភាពរស៉េីបនៃបញ្ហា​ ប្រភពមួយបាននិយាយដោយមិនបញ្ចេញឈ្មោះថា​ នេះ​គឺ​ជា​កុងត្រាប្រេង​រយៈ​ពេល​វែង វា​មិន​មែន​ជា​រឿង​សាមញ្ញ​ទេ​ក្នុង​ការ​បញ្ឈប់​ការ​ទិញ​ត្រឹមពេលតែមួយ​យប់។​

កាសែតអាមេរិក New York Times នៅថ្ងៃសៅរ៍នេះ​ ក៏បានដកស្រង់សម្តីមន្ត្រីជាន់ខ្ពស់ឥណ្ឌាពីរនាក់តែមិនបញ្ចេញឈ្មោះដែរថា​ គ្មា​នការផ្លាស់ប្តូរនៅក្នុងគោលនយោបាយរបស់រដ្ឋាភិបាលឥណ្ឌានោះទេ​ ដោយមន្ត្រីម្នាក់និយាយថារដ្ឋាភិបាលមិនបានផ្តល់អនុសាសន៍ណាមួយដល់ក្រុមហ៊ុនប្រេង​ ឱ្យកាត់បន្ថយការនាំចូលពីរុស្ស៉ីឡេីយ។

គួរបញ្ជាក់ថា​ លោក ត្រាំ កាលពីខែមុន បាននិយាយថា​ ឥណ្ឌានឹងប្រឈមមុខចំពោះការពិន័យបន្ថែមសម្រាប់ការទិញអាវុធ និងប្រេងរបស់រុស្ស៉ី ហេីយកាលពីថ្ងៃសុក្រ​ លោកបានប្រាប់អ្នកសារព័ត៌មានថា លោកបានឮថា ឥណ្ឌានឹងលែងទិញប្រេងពីរុស្ស៉ីទៀតហើយ៕