(កៀវ)៖​ នៅថ្ងៃសៅរ៍នេះ​ យោធាអ៊ុយក្រែន​ បានអះអាងពីការវាយប្រហារទីតាំងប្រេងនៅរុស្ស៉ី​ រួមទាំងរោងចក្រចម្រាញ់ប្រេងដ៏សំខាន់មួយ ក៏ដូចជាអាកាសយានដ្ឋានយោធា និងរោងចក្រអេឡិចត្រូនិចមួយកន្លែង។ នេះបេីយោងតាមការចេញផ្សាយដោយទីភ្នាក់ងារសារព័ត៌មាន​ Reuters នៅថ្ងៃសៅរ៍​ ទី២​ ខែសីហា​ ឆ្នាំ​ ២០២៥។

នៅក្នុងការប្រកាសតាមបណ្តាញតេឡេក្រាម​ កងកម្លាំងដ្រូនរបស់អ៊ុយក្រែន (USF) និយាយថា ពួកគេបានវាយប្រហាររោងចក្រចម្រាញ់ប្រេង Annanefteprodukt នៅទីក្រុង Ryazan ចម្ងាយប្រហែល ១៨០គីឡូម៉ែត្រ ភាគអាគ្នេយ៍នៃទីក្រុងមូស្គូ​ បណ្តាលឱ្យមានភ្លើងឆេះ។​ រោងចក្រចម្រាញ់ប្រេងនេះ​ ស្ថិតនៅតំបន់ព្រំប្រទល់ជាប់ភាគឦសានអ៊ុយក្រែន។

ដោយឡែក ទីភ្នាក់ងារស៉េីបការណ៍ SBU របស់អ៊ុយក្រែន បាននិយាយថា យន្តហោះដ្រូនរបស់ខ្លួន បានវាយប្រហារអាកាសយានដ្ឋានយោធា Primorsko-Akhtarsk របស់រុស្ស៉ី​ ដែលត្រូវបានប្រើជាទីតាំងសម្រាប់បាញ់ដ្រូនរយៈចម្ងាយឆ្ងាយ ទៅកាន់គោលដៅនានានៅអ៊ុយក្រែន។​ SBU បាននិយាយទៀតថា​ ខ្លួនក៏បានវាយលុករោងចក្រមួយនៅទីក្រុង​ Penza ដែលជាកន្លែងផ្គត់ផ្គង់គ្រឿងអេឡិចត្រូនិចដល់យោធារុស្ស៉ីផងដែរ។

Reuters មិ​នអាចផ្ទៀងផ្ទាត់ព័ត៌មាននេះដោយឯករាជ្យបានទេ​ ខណៈមិនទាន់អត្ថាធិប្បាយពីសំណាក់ភាគីរុស្ស៊ី៕