(ចូហាន់ណេសបឺគ)៖​ អាហ្រ្វិកខាងត្បូង​ បានព្រាងវិធានការគាំទ្រដល់ក្រុមហ៊ុននាំចេញ​ ដែលរងគ្រោះដោយពន្ធ​ ៣០ភាគរយរបស់ប្រធានាធិបតីអាមេរិក លោក​ ដូណាល់​ត្រាំ​ និងដែលត្រូវបានគេរំពឹងថា​ អាចបង្កឱ្យមានការបាត់បង់ការងារយ៉ាងទូលំទូលាយ​ នៅក្នុងវិស័យឧស្សាហកម្មរថយន្ត និងកសិកម្ម។ នេះបេីយោងតាមការចេញផ្សាយដោយទីភ្នាក់ងារសារព័ត៌មាន​ Reuters នៅថ្ងៃសៅរ៍​ ទី២​ ខែសីហា​ ឆ្នាំ​ ២០២៥។

ក្រសួងពាណិជ្ជកម្មអាហ្រ្វិកខាងត្បូង​ បានបេីកដំណេីរការកម្មវិធី​ Export Support Desk​ ដើម្បីជួយប្រឹក្សាយោបល់ដល់ក្រុមហ៊ុន​ដែលរងគ្រោះ។ ជាមួយគ្នានេះ​ រដ្ឋាភិបាលកំពុងដាក់ចេញនូវកញ្ចប់គាំទ្រ​ សម្រាប់អ្នកនាំចេញដែលងាយរងគ្រោះ​ ដោយព័ត៌មានលម្អិតនឹងត្រូវប្រកាសក្នុងពេលឆាប់ៗ។

ប្រធានាធិបតី​ លោក Cyril Ramaphosa បាននិយាយក្នុងសេចក្តីថ្លែងការណ៍មួយថា បណ្តាញទំនាក់ទំនងទាំងអស់នៅតែបើកចំហ​ ដើម្បីពិភាក្សាជាមួយសហរដ្ឋអាមេរិក ហើយអ្នកចរចារបស់យើងបានត្រៀមខ្លួនរួចរាល់​ ក្នុងការរង់ចាំការអញ្ជើញពីសហរដ្ឋអាមេរិក។

គួរបញ្ជាក់ថា​ សហរដ្ឋអាមេរិក គឺជាដៃគូពាណិជ្ជកម្មទ្វេភាគីធំទីពីររបស់អាហ្វ្រិកខាងត្បូង បន្ទាប់ពីចិន ដែលនាំចូលទំនិញដូចជារថយន្ត ផលិតផលដែក និងដែកថែប ស្រា និងផ្លែក្រូច។ Mercedes-Benz អាហ្រ្វិកខាងត្បូង​ គឺជាក្រុមហ៊ុននាំចេញរថយន្តដ៏ធំមួយរបស់ប្រទេសនេះទៅកាន់សហរដ្ឋអាមេរិក៕