(ហ្កាហ្សា)៖ កាលពីថ្ងៃសៅរ៍ ទី២ ខែសីហា ក្រុមហាម៉ាសបាននិយាយថា ខ្លួននឹងមិនរំសាយអាវុធជាដាច់ខាត លុះត្រាតែរដ្ឋប៉ាឡេស្ទីនឯករាជ្យមួយ ត្រូវបានបង្កើតឡើង។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។

ក្រុមសកម្មប្រយុទ្ធហាម៉ាស បាននិយាយក្នុងសេចក្តីថ្លែងការណ៍យ៉ាងដូច្នេះថា «ចលនាតស៊ូប្រដា​ប់អាវុធរបស់យើង មិនអាចត្រូវបោះបង់ចោលដាច់ខាត លើកលែងតែមានស្តារឡើងវិញទាំងស្រុងនូវសិទ្ធិជាតិរបស់យើង ដែលក្នុងនោះសំខាន់បំផុត គឺការបង្កើតរដ្ឋប៉ាឡេស្ទីនមួយ មានឯករាជ្យនិងអធិបតេយ្យពេញលេញ ហើយមានទីក្រុងហ្សេរុយសាឡិមជារដ្ឋធានី»។

សង្រ្គាមនៅហ្កាហ្សា បានចាប់ផ្តើមនៅពេលក្រុមសកម្មប្រយុទ្ធប៉ាឡេស្ទីនដឹកនាំដោយហាម៉ាស បានឆ្មក់សម្រុកចូលវាយប្រហារ​តំបន់ភាគខាងត្បូងអ៉ីស្រាអែល កាលពីថ្ងៃទី៧ ខែតុលា ឆ្នាំ២០២៣ ហើយបណ្តាលឱ្យមនុស្សខ្ទង់១២០០នាក់ស្លាប់ និង២៥១នាក់ផ្សេងទៀត ត្រូវបានចាប់យកធ្វើជាចំណាប់ខ្មាំងទៅហ្កាហ្សា។ ប្រតិបត្តិការយោធាសងសឹករបស់អ៉ីស្រាអែលនៅហ្កាហ្សា បានប្រែក្លាយតំបន់នេះទៅជាវាលវិនាសហិនហោច ដោយសម្លាប់មនុស្សជាង ៦០ ០០០នាក់ និងបង្កឱ្យមានមហន្តរាយមនុស្សធម៌ដ៏ធំមួយ។

គួរបញ្ជាក់ថា ដំណើរចរចាមិនដោយផ្ទាល់រវាងហាម៉ាសនិងអ៉ីស្រាអែល ក្នុងគោលដៅស្វែងរកបទឈប់បាញ់រយៈពេល៦០ថ្ងៃ សម្រាប់សង្រ្គាមហ្កាហ្សា និងកិច្ចព្រមព្រៀងដោះលែងចំណាប់ខ្មាំនៅសេសសល់ បានបញ្ចប់ទៅកាលពីសប្តាហ៍មុន ដោយមិនទទួលបានលទ្ធផល ខណៈភាគីទាំងពីរបានទម្លាក់កំហុសដាក់គ្នាទៅវិញទៅមក ចំពោះភាពជាប់គាំង៕