(ប៉េកាំង)៖ ប៉ុន្មានថ្ងៃកន្លងទៅនេះ កំពង់ផែដែលអាចចតនាវាទេសចរណ៍ Shekou នៃក្រុងShenzhenដែលជាតំបន់ផ្ទេរអ្នកដំណើរអន្តរជាតិនៅច្រកកំពង់ផែសមុទ្រលើកដំបូងរបស់ចិន បានដាក់ឱ្យប្រើប្រាស់ជាផ្លូវការ ។ ពាណិជ្ជករដែលមកពីប្រទេសអាហ្សង់ទីន ឈីលីនិងប្រេស៊ីលលើកទីមួយបានចូលដែនចិន ដោយអនុលោមតាម គោលនយោបាយថ្មីបំផុតស្តីពីការលើកលែងទិដ្ឋាការ ដែលបានកាត់បន្ថយពេលវេលាឆ្លងកាត់ពី២ម៉ោង កន្លះកាលពីមុនមកនៅត្រឹមមិនដល់៣០នាទី ។ នេះជាសញ្ញាកត់សម្គាល់ថា គោលនយោបាយលើកលែង ទិដ្ឋាការរបស់ចិនត្រូវអនុវត្តពីព្រលានយន្តហោះទៅដល់កំពង់ផែសមុទ្រ ដែលបានពន្លឿនការអភិវឌ្ឍនៃសេដ្ឋកិច្ច និងពាណិជ្ជកម្មរវាងចិននិងអន្តរជាតិ។

នេះជាការឆ្លុះបញ្ចាំងមួយនៃការដែលប្រទេសចិន អនុវត្តគោលនយោបាយអនុគ្រោះស្តីពីការលើកលែងទិដ្ឋាការជាបន្តបន្ទាប់ ក្នុងរយៈពេលប៉ុន្មានឆ្នាំកន្លងទៅនេះ។ ក្នុងរយៈពេល៥ឆ្នាំចុងក្រោយនេះ ពោលគឺក្នុងអំឡុងពេល “ផែនការអភិវឌ្ឍន៍ជាតិ៥ឆ្នាំទី១៤”របស់ចិន រដ្ឋាភិបាលចិនបានបន្តធ្វើឱ្យប្រសើរឡើង នូវគោលនយោបាយលើកលែងទិដ្ឋាការគ្រប់ប្រភេទ ដើម្បីជំរុញទំការផ្លាស់ប្តូរ និងការប្រាស្រ័យទាក់ទងអន្តរជាតិ។ បច្ចុប្បន្ននេះ ចិនបានអនុវត្តគោលនយោបាយលើកលែងទិដ្ឋាការ ដោយឯកតោភាគី ឬលើកលែងទិដ្ឋាការទៅវិញទៅមកដោយគ្រប់ជ្រុងជ្រោយ ចំពោះប្រទេសចំនួន៧៥រួចហើយ ហើយប្រទេស ដែលលើកលែងទិដ្ឋាការ ខណៈពេលឆ្លងកាត់ដែនបានពង្រីកដល់៥៥ប្រទេស ច្រកចូលដែនបានបន្ថែមដល់៦០កន្លែង ពេលវេលាឆ្លងកាត់ដែនបានពង្រីកដល់២៤០ម៉ោង ។ ក្រៅពីនេះ ក៏បានអនុវត្តគោលនយោបាយលើកលែងទិដ្ឋាការ ប្រកបដោយលក្ខណៈតំបន់ ដូចជាការលើកលែងទិដ្ឋាការ សម្រាប់ការចូលដែននៅខេត្ត Hainan ការលើកលែងទិដ្ឋាការ សម្រាប់ការចូលដែននៃក្រុមទេសចរណ៍របស់ប្រទេសអាស៊ាន និងការលើកលែងទិដ្ឋាការសម្រាប់ការចូលដែន នៃនាវាទេសចរណ៍ជាដើម ដែលបានផ្តល់ភាពងាយស្រួលយ៉ាងខ្លាំងដល់ការធ្វើទេសចរណ៍ ធ្វើពាណិជ្ជកម្មនិងបំពេញទស្សនកិច្ច នៅប្រទេសចិនរបស់ជនជាតិបរទេស។

ក្នុងរយៈពេល៥ឆ្នាំចុងក្រោយនេះ ជាពិសេសគឺចាប់ពីចុងឆ្នាំ២០២៣មក គោលនយោបាយលើកលែងទិដ្ឋាការរបស់ចិន បន្តធ្វើបច្ចុប្បន្នភាព ដែលគ្របដណ្តប់តម្រូវការ ក្នុងវិស័យជាច្រើនដូចជាទេសចរណ៍ ពាណិជ្ជកម្មនិងការឆ្លងដែនជាដើម ដែលជាសក្ខីភាពនៃកិច្ចខិតខំប្រឹងប្រែងរបស់ចិន ក្នុងការបន្តពង្រីកការបើកទូលាយចំពោះអន្តរជាតិ។ ការបង្ហាញផ្ទាល់បំផុតគឺ បានជំរុញភាពពេញនិយមនៃ “China Travel” នៅទូទាំងពិភពលោក ។ នៅឆ្នាំ២០២៤ ចិនបានទទួលអ្នកទេសចរបរទេស ចំនួន២៦លាន៩សែន៤ម៉ឺននាក់ ដែលកើនឡើង៩៦ភាគរយបើប្រៀបធៀបនឹងរយៈពេលដូចគ្នានាឆ្នាំមុន ។ ការធ្វើទេសចរណ៍នៅប្រទេសចិន ទិញទំនិញនៅប្រទេសចិននិងញ៉ាំម្ហូបអាហារនៅប្រទេសចិន បានក្លាយជាភាពទាន់សម័យអន្តរជាតិថ្មី។

គោលនយោបាយលើកលែងទិដ្ឋាការមិនត្រឹមតែ បាននាំមកនូវភាគលាភខាងទេសចរណ៍ប៉ុណ្ណោះទេ ថែមទាំងក៏ជាឧបករណ៍ពន្លឿន សេដ្ឋកិច្ចនិងពាណិជ្ជកម្មផងដែរ។ ក្នុងរយៈពេល៥ឆ្នាំកន្លងទៅនេះ ឆ្លងតាមរយៈការរៀបចំពិព័រណ៍ទ្រង់ទ្រាយធំ ដូចជាពិព័រណ៍នាំចូលចិនអន្តរជាតិ និងពិព័រណ៍ទំនិញប្រើប្រាស់ចិនអន្តរជាតិ បូករួមទាំងវិធានការផ្តល់ភាពងាយស្រួលដូចជា ការលើកលែងទិដ្ឋាការជាដើម ធ្វើឱ្យពាណិជ្ជករជាច្រើនមកចូលរួមពិព័រណ៍ដោយយកផលិតផលថ្មី ដែលជំរុញការនាំចូលទំនិញ ប្រើប្រាស់សរុបឡើងដល់ ៧,៤ទ្រីលានយាន់ប្រាក់ចិនពីឆ្នាំ២០២១ ដល់ឆ្នាំ២០២៤ក៏ដូចជាធ្វើឱ្យទំនិញ ប្រកបដោយគុណភាពល្អលើ ទូទាំងពិភពលោកពន្លឿនការចូលក្នុងប្រទេសចិន។

គោលនយោបាយលើកលែងទិដ្ឋាការ បានបង្ហាញពីប្រពៃណីទទួលភ្ញៀវយ៉ាងរាក់ទាក់របស់ជនជាតិចិន តាំងពីបុរាណកាលមក ហើយក៏ជាសក្សី នៃការប្តេជ្ញាចិត្តរបស់រដ្ឋាភិបាលចិន ស្តីពីការពង្រីកការបើកទូលាយ ចំពោះអន្តរជាតិជាបន្តបន្ទាប់ដែរ ។ ក្នុងរយៈពេល៥ឆ្នាំខាងមុខនេះ ស្វាគមន៍ឥស្សរជនបរទេសកាន់តែច្រើនមកកាន់ប្រទេសចិន ទស្សនាប្រទេសចិន និងឈ្វេងយល់ពីប្រទេសចិន។ ពេលវេលានឹងបន្តបញ្ជាក់ថា ការអភិវឌ្ឍរបស់ចិនមិនអាចឃ្លាតឆ្ងាយពីពិភពលោក ហើយភាពរុងរឿងរបស់ពិភពលោក ក៏ត្រូវការប្រទេសចិនដែរ៕

វិទ្យុមិត្តភាពកម្ពុជាចិន