(វ៉ាស៊ីនតោន)៖ មនុស្សជំនិតម្នាក់របស់ប្រធានាធិបតីអាមេរិក លោក ដូណាល់ ត្រាំ កាលពីថ្ងៃអាទិត្យ ទី៣ ខែសីហា បានចោទប្រកាន់ឥណ្ឌាថាបានផ្គត់ផ្គង់ហិរញ្ញវត្ថុដល់សង្រ្គាម របស់រុស្ស៉ីនៅអ៊ុយក្រែន តាមរយៈការបន្តទិញប្រេងពីទីក្រុងមូស្គូ ខណៈសហរដ្ឋអាមេរិកកំពុងបង្កើនការដាក់សម្ពាធលើទីក្រុងញូវដែលីឱ្យបញ្ឈប់ការទិញប្រេងពីរុស្ស៉ី។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

លោក Stephen Miller ជានាយរងខុទ្ទការល័យសេតវិមាន បាននិយាយថាអ្វីដែលលោក ត្រាំ មិនអាចទទួលយកបាន នោះគឺឥណ្ឌានៅតែបន្តផ្គត់ផ្គង់ហិរញ្ញវត្ថុដល់សង្គ្រាមរបស់ រុស្ស៉ីតាមរយៈការបន្តទិញប្រេងពីមូស្គូ។ ការរិះគន់របស់លោក Miller គឺជាការរិះគន់ខ្លាំងបំផុតមួយរបស់រដ្ឋបាលលោក ត្រាំ លើឥណ្ឌាដែលជាសម្ព័ន្ធមិត្តដ៏សំខាន់បំផុតរបស់ សហរដ្ឋអាមេរិកនៅក្នុងតំបន់ឥណ្ឌូប៉ាស៊ីហ្វិក។ ក្នុងបទសម្ភាសន៍ជាមួយកម្មវិធី Sunday Morning Futures នៃទូរទស្សន៍ Fox News លោក Miller បានគូសបញ្ជាក់ដូច្នេះថា «គេគ្រប់គ្នានឹងតក់ស្លុតដែលបានដឹងថាឥណ្ឌាមានទំនាក់ទំនងជាមូលដ្ឋានជាមួយចិន នៅក្នុងការទិញប្រេងពីរុស្ស៉ី។ នេះគឺជាការពិតមិនអាចប្រកែកបាន»។

គួរបញ្ជាក់ថា ពន្ធគយ ២៥ភាគរយរបស់សហរដ្ឋអាមេរិកលើទំនិញឥណ្ឌាបានចូលជាធរមានកាលពីថ្ងៃសុក្រសប្ដាហ៍មុន ដោយសារតែទីក្រុងញូវដែលីនៅតែបន្តទិញប្រេង និងអាវុធពីរុស្ស៉ី។ លោក ត្រាំ ក៏បានគំរាមយកពន្ធគយ ១០០ភាគរយលើទំនិញនាំចូលទៅកាន់សហរដ្ឋអាមេរិកពីបណ្ដាប្រទេសទាំងឡាយណាដែលទិញប្រេងពីរុស្ស៉ីផងដែរ ប្រសិនបើទីក្រុងមូស្គូមិនព្រមទទួលយកបទឈប់បាញ់ជាមួយអ៊ុយក្រែនទេនោះ៕