(ឌូបៃ)៖ អ៉ីរ៉ង់ កាលពីថ្ងៃអាទិត្យ ទី៣ ខែសីហា បានបង្កើតក្រុមប្រឹក្សាការពារជាតិថ្មីមួយឡើង បន្ទាប់ពីសង្រ្គាមផ្លូវអាកាសជាមួយអ៉ីស្រាអែលកាលពីខែមិថុនា ដែលជាបញ្ហាប្រឈម យោធាធំបំផុតមួយរបស់អ៉ីរ៉ង់ ចាប់តាំងពីសង្រ្គាមក្នុងទសវត្សរ៍ឆ្នាំ១៩៨០ជាមួយអ៉ីរ៉ាក់។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

លេខាធិការដ្ឋាននៃក្រុមប្រឹក្សាសន្តិសុខជាតិកំពូលរបស់អ៉ីរ៉ង់ បានគូសបញ្ជាក់ថា «ក្រុមប្រឹក្សាការពារជាថ្មីនឹងត្រួតពិនិត្យផែនការការពារជាតិ និងការពង្រឹងសមត្ថភាពរបស់ កងម្លាំងប្រដាប់អាវុធអ៉ីរ៉ង់»។

ក្រុមប្រឹក្សាការពារជាតិថ្មីខាងលើនឹងស្ថិតនៅក្រោមការដឹកនាំរបស់ប្រធានាធិបតីអ៉ីរ៉ង់ លោក Masoud Pezeshkian និងមានសមាជិកមកពីមេដឹកនាំក្រសួងធំៗចំនួន៣របស់ រដ្ឋាភិបាលអ៉ីរ៉ង់ មេបញ្ជាការជាន់ខ្ពស់នៃកងកម្លាំងប្រដាប់អ៉ីរ៉ង់ និងរដ្ឋមន្ត្រីពាក់ព័ន្ធ។ កាលពីថ្ងៃអាទិត្យម្សិលមិញ អគ្គមេបញ្ជាការយោធាអ៉ីរ៉ង់ លោក Amir Hatami បានព្រមានថា ការគំរាមកំហែងពីអ៉ីស្រាអែលនៅតែមាន ហើយមិនគួរត្រូវបានមើលស្រាលឡើយ៕