(តៃប៉ិ)៖ មនុស្សចំនួន ៤នាក់បានស្លាប់ និងជាង ៥ ៩០០នាក់ត្រូវជម្លៀសចេញពីភាគខាងត្បូង បន្ទាប់ពីកោះតៃវ៉ាន់ទទួលរងនូវភ្លៀងធ្លាក់ខ្លាំង​ បណ្តាលឱ្យ​បាក់​ដី និង​ទឹកជំនន់ពាសពេញតំបន់​។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃចន្ទ ទី៤ ខែសីហា ឆ្នាំ ២០២៥។

មនុស្ស ៣នាក់កំពុងបាត់ខ្លួន និង ៧៧នាក់របួស គិតចាប់តាំងពីចុងខែកក្កដាមក នៅពេលដែលព្យុះភ្លៀង និងខ្យល់ខ្លាំង ចាប់ផ្តើមបណ្តាលឱ្យមានទឹកជំនន់ និងការរអិលបាក់ដីនៅភាគខាងត្បូងតៃវ៉ាន់ ដែលជាតំបន់កសិកម្មដ៏សំខាន់។ នាយករដ្ឋមន្រ្តីតៃវ៉ាន់ លោក Cho Jung-tai បាននិយាយថា គណៈរដ្ឋមន្រ្តីកំពុងដាក់សំណើពិសេស ក្នុងសប្តាហ៍នេះ ដើម្បីជួយដល់កិច្ចប្រឹងប្រែងសង្រ្គោះ។

រដ្ឋបាលតៃវ៉ាន់បានឱ្យដឹថា មនុស្សជាង ២ ០០០នាក់ នៅតែមិនទាន់អាចត្រឡប់ទៅផ្ទះវិញបាន ដោយភាគច្រើនជាអ្នកភូមិនៅតំបន់ភ្នំភាគខាងត្បូង ខណៈក្រុមសង្រ្គោះកំពុងធ្វើការស្តារផ្លូវថ្នល់ ដែលត្រូវបានកាត់ផ្តាច់ដោយការបាក់ដី ឬទឹកជំនន់ និងប៉ះពាល់ដល់ចែកចាយស្បៀងអាហារ និងថ្នាំពេទ្យ។ បើតាមមន្រ្តីឧតុនិយម​​ ឥទ្ធិពលនៃភ្លៀងធ្លាក់​ទំនងជា​ថមថយ​ទៅវិញ ​ចាប់​ពី​ថ្ងៃ​ចន្ទនេះ ខណៈ​ការ​ព្រមាន​អំពី​ការ​រអិល​បាក់​ដី និង​ទឹក​ជំនន់​នៅតែបន្ត​សម្រាប់​តំបន់ភ្នំ​ភាគ​ខាង​ត្បូង៕