(អ៉ីស្លាម៉ាបាដ)៖ ប៉ាគីស្ថាន និងអ៉ីរ៉ង់ បានចុះកិច្ចព្រមព្រៀងបង្កើនពាណិជ្ជកម្មទ្វេភាគី ហើយប្តេជ្ញាធ្វើការយ៉ាងជិតស្និទ្ធថែមទៀត ដើម្បីលុបបំបាត់ការគំរាមកំហែងនៃអំពើភេរវកម្ម អំឡុងទស្សនកិច្ចរបស់ប្រធានាធិបតីអ៉ីរ៉ង់ លោក Masoud Pezeshkian នៅប៉ាគីស្ថាន កាលពីចុងសប្តាហ៍កន្លងទៅ។ នេះបើយោងតាមការដកស្រង់ផ្សាយពីសារព័ត៌មាន Al Jazeera នៅថ្ងៃចន្ទ ទី៤ ខែសីហា ឆ្នាំ ២០២៥។

កិច្ចព្រមព្រៀងនេះ គ្របដណ្តប់លើវិស័យផ្សេងៗមួយចំនួន រួមទាំងថាមពល ពាណិជ្ជកម្ម។ ថ្លែងក្នុងសន្និសីទសារព័ត៌មាន នាយករដ្ឋមន្ត្រីប៉ាគីស្ថាន លោក Shehbaz Sharif គូសបញ្ជាក់ថា «យើងបានកំណត់គោលដៅពាណិជ្ជកម្មចំនួន ១០ពាន់លានដុល្លារ ហើយសង្ឃឹមថានឹងសម្រេចបានឆាប់ តាមដែលអាចធ្វើទៅបាន»។ ចំណែក លោក Pezeshkian បានអរគុណ​រដ្ឋាភិបាល និង​ប្រជាជន​ប៉ាគីស្ថាន ដែល​គាំទ្រ​​អ៉ីរ៉ង់អំឡុង​ពេល​នៃសង្រ្គាម ១២ថ្ងៃជាមួយអ៉ីស្រាអែល និងអំពាវនាវឱ្យមានកិច្ចសហប្រតិបត្តិការកាន់តែប្រសើរ ជុំវិញការការពារព្រំដែន ដើម្បីទប់ទល់នឹងការគំរាមកំហែងផ្នែកសន្តិសុខ។

គួរបញ្ជាក់ថា ទំនាក់ទំនងរវាងប៉ាគីស្ថាន និងអ៉ីរ៉ង់ជារឿយៗ តែងមានភាពរង្គោះរង្គើ ជាពិសេសជុំវិញភាពតានតឹងឆ្លងព្រំដែន ដែលបានកើនឡើងក្នុងខែមករា ឆ្នាំ ២០២៤ នៅពេលដែលភាគីទាំងពីរបាញ់ផ្លោងដាក់គ្នា។ ទោះ​បីជា​មាន​ភាព​តានតឹង​ក៏​ដោយ ប្រទេស​ទាំង​ពីរ​បន្តរក្សា​មធ្យោបាយការទូត​៕