(ម៉ានីល)៖ នៅថ្ងៃចន្ទ ទី៤ ខែសីហា យោធាហ្វីលីពីនបានឱ្យដឹងថា កងទ័ពជើងទឹករបស់ខ្លួន បានចាប់ផ្តើមធ្វើប្រតិបត្តិការល្បាតរួមគ្នាជាលើកដំបូង ជាមួយសមភាគីឥណ្ឌា នៅឯតំបន់សមុទ្រចិនខាងត្បូងដែលមានបញ្ហាវិវាទ។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

ការល្បាតនោះបានចាប់ផ្តើមកាលពីថ្ងៃអាទិត្យកន្លងទៅ និងមានរយៈពេល២ថ្ងៃ ហើយចូលរួមដោយនាវាចម្បាំង៣គ្រឿងរបស់ឥណ្ឌា។ វាកើតឡើងស្របពេលដែលនៅថ្ងៃចន្ទនេះ ប្រធានាធិបតីហ្វីលីពីន លោក Ferdinand Marcos ចេញដំណើរដើម្បីទៅបំពេញ​ទស្សនកិច្ចផ្លូវរដ្ឋនៅប្រទេសឥណ្ឌា។

ប៉ុន្មានឆ្នាំចុងក្រោយនេះ ហ្វីលីពីនបានខិតខំបង្កើនកិច្ចសហប្រតិបត្តិការការពារជាតិ ជាមួយសម្ព័ន្ធមិត្តជាច្រើន ក្រោយហេតុការណ៍​ប្រឈមមុខនិងប៉ះទង្គិចគ្នាជាបន្តបន្ទាប់ នៅសមុទ្រចិនខាងត្បូង ដែលមានបញ្ហាវិវាទជាមួយចិន។ ពីមុនមក ហ្វីលីពីនធ្លាប់ទិញមីស៉ីលគ្រូស BrahMos ពីឥណ្ឌា ដែលជាមីស៉ីលល្បឿនលឿនជាងសំឡេង។

គួរបញ្ជាក់ថា ឥណ្ឌាផ្ទាល់ក៏មានជម្លោះព្រំដែនជាមួយចិន នៅតំបន់ជួរភ្នំហិម៉ាល័យផងដែរ ហើយជាសមាជិកនៃក្រុមប្រទេស Quad ដែលរួមមានប្រទេស៣ទៀត គឺសហរដ្ឋអាមេរិក ជប៉ុន និងអូស្រ្តាលី។ ទីក្រុងប៉េកាំងតែងតែចោទប្រកាន់ម្តងហើយម្តងទៀតថា ភាពជាដៃគូចតុភាគីនេះដែលផ្តួចផ្តើមដំបូងដោយ អតីតនាយករដ្ឋមន្រ្តីជប៉ុន លោក Shinzo Abe គឺត្រូវបានបង្កើតឡើង ដើម្បីបម្រើ​ជាមធ្យោបាយរាំងខ្ទប់ការអភិវឌ្ឍរបស់ចិន៕