(តូក្យូ)៖ នៅថ្ងៃចន្ទ ទី៤ ខែសីហា នាយករដ្ឋមន្រ្តីជប៉ុន លោក Shigeru Ishiba បានិយាយថា រដ្ឋាភិបាលត្រៀមខ្លួនរួចជាស្រេច ក្នុងការចងក្រងថវិកាបន្ថែម ដើម្បីទប់ទល់នឹងផលប៉ះពាល់សេដ្ឋកិច្ច បណ្តាលមកពីពន្ធគយរបស់សហរដ្ឋអាមេរិក ខណៈវិធានការនេះ អាចនាំបន្ថែមភាពតានតឹងផ្នែកហិរញ្ញវត្ថុ ដែលកំពុងធ្លាក់ចុះស្រាប់។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters។

នៅពេលត្រូវបានសួរដោយសមាជិកសភាមកពីគណបក្សប្រឆាំង ថាតើរដ្ឋាភិបាលនឹងចងក្រងថវិកាបន្ថែម ដោយរួមបញ្ចូលនូវការកាត់បន្ថយពន្ធឬទេ? លោក Ishiba បានប្រាប់សភាដូច្នេះថា «យើងនឹងចងក្រង ប្រសិនបើចាំបាច់ ដោយគិតគូរពីកិច្ចពិភាក្សាជាមួយភាគីផ្សេងទៀត»។ ប្រសិនបើរដ្ឋាភិបាលជប៉ុន សម្រេចចងក្រងមែននោះ នឹងត្រូវដាក់ជូនសម័យប្រជុំសភាវិសាមញ្ញ នៅខែកញ្ញាខាងមុខ។

គួរបញ្ជាក់ថា ការចងក្រងថវិកាបន្ថែម បានក្លាយទៅជាការអនុវត្តជាប្រចាំក្នុងប្រទេសជប៉ុន ដែលជាការអំពាវរបស់មេដឹកនាំណាមួយ ឱ្យបង្កើនការចំណាយដើម្បីជួយដល់សេដ្ឋកិច្ច ជាហេតុធ្វើឱ្យគោលនយោបាយសារពើពន្ធ មានភាពធូររលុង។ លោក Ishiba មិនបានអត្ថាធិប្បាយពីទំហំនៃថវិកាបន្ថែមទេ ប៉ុន្តែអ្នកវិភាគមួយចំនួនព្យាករថា វាអាចឈានដល់ប្រហែល ១០ពាន់ពាន់លានយ៉េន ឬ ៦៧.៦៨ពាន់លានដុល្លារ ដែលនឹងតម្រូវឱ្យមានការចេញមូលបត្របំណុលបន្ថែម៕