(ហ៊្សេរុយសាឡិម)៖ មន្រ្តីសន្តិសុខអ៉ីស្រាអែលដែលចូលនិវត្តន៍រាប់រយនាក់ ក្នុងនោះរួមមានទាំងអតីតប្រធានទីភ្នាក់ងារចារកម្ម បានរួមគ្នាទទូចឱ្យប្រធានាធិបតីអាមេរិក លោក ដូណាល់ ត្រាំ ដាក់សម្ពាធលើរដ្ឋាភិបាលអ៉ីស្រាអែល ដើម្បីបញ្ចប់សង្រ្គាមនៅតំបន់ហ្កាហ្សា។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នាថ្ងៃចន្ទ ទី៤ ខែសីហា ឆ្នាំ២០២៥។

ក្នុងលិខិតចំហមួយដែលត្រូវបានចែករំលែកជាមួយប្រព័ន្ធផ្សព្វផ្សាយ នាថ្ងៃចន្ទនេះ ក្រុមអតីតមន្រ្តីទាំងនោះ បាននិយាយថា «យោងតាមការវិនិច្ឆ័យប្រកបដោយវិជ្ជាជីវៈរបស់ពួកយើង គឺក្រុមហាម៉ាសលែងបង្កការគំរាមកំហែងជាយុទ្ធសាស្រ្តចំពោះ​អ៉ីស្រាអែលតទៀតហើយ»។

អតីតនាយកម្នាក់នៃទីភ្នាក់ងារសន្តិសុខ Shin Bet គឺលោក Ami Ayalon បានលើកឡើងថា «ដំបូងឡើយ សង្រ្គាមនៅហ្កាហ្សា គឺជាសង្រ្គាមមួយដែលត្រឹមត្រូវនិងយុត្តិធម៌ ពោលគឺជាសង្រ្គាមការពារខ្លួន ប៉ុន្តែនៅពេលយើងបានសម្រេចគោលដៅយោធាទាំងអស់ហើយនោះ សង្រ្គាមនេះលែងជាសង្រ្គាមត្រឹមត្រូវយុត្តិធម៌ទៀតហើយ។ សង្រ្គាមកំពុងឈានចូលដល់ខែទី២៣ និងកំពុងនាំឱ្យអ៉ីស្រាអែលបាត់បង់​សន្តិសុខក៏ដូចជាអត្តសញ្ញាណរបស់ខ្លួន»។

លិខិតចំហខាងលើត្រូវបានចុះហត្ថលេខាដោយមនុស្សសរុប៥៥០នាក់ ក្នុងនោះរួមមានទាំងអតីតប្រធានទីភ្នាក់ងារ Shin Bet និង​ទីភ្នាក់ងារចារកម្ម Mossad ហើយបានអំពាវនាវឱ្យលោក ត្រាំ ជួយខ្នះខ្នែងជំរុញនាយករដ្ឋមន្រ្តីអ៉ីស្រាអែល លោក Benjamin Netanyahu ឆ្ពោះទៅរកបទឈប់បាញ់។

គួរបញ្ជាក់ថា អ៉ីស្រាអែលបានធ្វើសង្រ្គាមនៅហ្កាហ្សា ឆ្លើយតបការវាយប្រហារដ៏ភ្ញាក់ផ្អើលរបស់ក្រុមហាម៉ាស កាលពីថ្ងៃទី៧ ខែតុលា ឆ្នាំ២០២៣។ ប៉ុន្មានសប្តាហ៍ចុងក្រោយនេះ អ៉ីស្រាអែលបានរងសម្ពាធខ្លាំងឡើងពីសហគមន៍អន្តរជាតិ ឱ្យយល់ព្រម​ចំពោះបទឈប់បាញ់ ដែលអាចបើកផ្លូវការដោះលែងចំណាប់ខ្មាំងនៅសេសសល់ ហើយអនុញ្ញាតឱ្យទីភ្នាក់ងាររបស់ UN ចែកចាយជំនួយមនុស្សធម៌ដោយរលូន។ យ៉ាងណាមិញ មន្រ្តីអ៉ីស្រាអែលមួយចំនួន បែរជាកំពុងជំរុញឱ្យយោធាអ៉ីស្រាអែល បន្តនិងបង្កើនប្រតិបត្តិការរបស់ខ្លួន ហើយឱ្យតំបន់ហ្កាហ្សាស្ថិតក្រោមការត្រួតត្រាទាំងស្រុង ឬដោយផ្អែកខ្លះ៕