(ប៉េកាំង)៖ ទីក្រុងប៉េកាំង ប្រទេសចិន នៅថ្ងៃចន្ទនេះ បានព្រមានដល់ពលរដ្ឋគ្រប់ស្រុកនៅទូទាំងទីក្រុង អំពីភ្លៀងធ្លាក់ខ្លាំងមួយទៀត ដោយប្រាប់ពួកគេឱ្យចៀសវាង ការធ្វើដំណើរចេញទៅខាងក្រៅ បន្ទាប់ពីទឹកជំនន់មួយសប្តាហ៍កន្លងមក បានឆក់យកជីវិតមនុស្សច្រើន មិនធ្លាប់មានគិតចាប់តាំងពីឆ្នាំ ២០១២។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃចន្ទ ទី៤ ខែសីហា ឆ្នាំ ២០២៥។

អ្នកព្យាករអាកាសធាតុ បានព្រមានថា ភ្លៀងកម្រិត ២០០មីលីម៉ែត្រ អាចវាយប្រហារផ្នែកខ្លះនៃទីក្រុងប៉េកាំង ក្នុងរយៈពេល ៦ម៉ោង ចាប់ពីថ្ងៃត្រង់នេះ។ អាជ្ញាធរនិយាយថា មានហានិភ័យនៃទឹកជំនន់ និងការរអិលបាក់ដីធ្ងន់ធ្ងរ។ គិតត្រឹមថ្ងៃត្រង់នៅថ្ងៃចន្ទនេះ ទីក្រុងប៉េកាំង បានដាក់ខណ្ឌទាំង ១៦របស់ខ្លួន ឱ្សត្រៀមខ្លួនជម្លៀសក្នុងកម្រិតខ្ពស់បំផុត។

គួរបញ្ជាក់ថា ទីក្រុងប៉េកាំង មានប្រជាជន ២២លាននាក់ ទទួលបានទឹកភ្លៀងជាមធ្យម ៦០០មីលីម៉ែត្រក្នុងមួយឆ្នាំ។ តាំងពីថ្ងៃទី២៨ ខែកក្កដាមក ទីក្រុងមួយនេះស្ថិតក្នុងស្ថានភាពត្រៀមខ្លួន ដោយផ្នែកខ្លះនៃមហាកំផែង និងកន្លែងកម្សាន្តនានាត្រូវបានបិទ ក៏ដូចជាបញ្ឈប់ប្រតិបត្តិការអាជីវកម្មក្រោមដី។ យ៉ាងហោចណាស់ មនុស្សចំនួន ៤៤នាក់បានស្លាប់ បន្ទាប់ពីមានភ្លៀងធ្លាក់ខ្លាំង ចន្លោះថ្ងៃទី២៣ ដល់ថ្ងៃទី២៩ ខែកក្កដា៕