(ហ្គាហ្សា)៖ ក្រុមហាម៉ាសបានប្រកាសកាលពីថ្ងៃអាទិត្យថា ខ្លួនបានត្រៀមខ្លួនរួចជាស្រេចក្នុងការសម្របសម្រួលជាមួយកាកបាទក្រហម ដើម្បីបញ្ជូនជំនួយទៅឲ្យចំណាប់ខ្មាំងដែលខ្លួនកំពុងឃុំឃាំង ប្រសិនបើអ៊ីស្រាអែលយល់ព្រមតាមលក្ខខណ្ឌមួយចំនួន។ សេចក្តីប្រកាសនេះបានធ្វើឡើង បន្ទាប់ពីវីដេអូដែលខ្លួនបានចេញផ្សាយ ដែលបង្ហាញពីចំណាប់ខ្មាំងម្នាក់ស្ថិតក្នុងស្ថានភាពស្គមរីងរៃ បានបង្កឲ្យមានការថ្កោលទោសយ៉ាងខ្លាំងក្លាពីមហាអំណាចលោកខាងលិច។

ទីភ្នាក់ងារសារព័ត៌មាន Reuters បានរាយការណ៍ថា លក្ខខណ្ឌដែលហាម៉ាសបានដាក់ចេញរួមមាន អ៊ីស្រាអែលត្រូវតែបើកច្រករបៀងមនុស្សធម៌ជាអចិន្ត្រៃយ៍ និងបញ្ឈប់ការវាយប្រហារផ្លូវអាកាសក្នុងអំឡុងពេលចែកជំនួយ។

វីដេអូដែលបង្កឲ្យមានភាពចម្រូងចម្រាសនោះ បានបង្ហាញពីចំណាប់ខ្មាំងជនជាតិអ៊ីស្រាអែលឈ្មោះ Evyatar David ដែលមានសភាពស្គមរហូតដល់ឃើញឆ្អឹង កំពុងជីករណ្តៅមួយដែលគាត់និយាយថាសម្រាប់ផ្នូររបស់គាត់ផ្ទាល់។ វីដេអូនេះបានធ្វើឲ្យប្រជាជនអ៊ីស្រាអែលតក់ស្លុតយ៉ាងខ្លាំង និងបានបង្កឲ្យមានការថ្កោលទោសពីបណ្តាប្រទេសលោកខាងលិច ហើយក្រុមប្រឹក្សាសន្តិសុខ UN នឹងបើកសម័យប្រជុំពិសេសមួយលើបញ្ហានេះ។

គួរបញ្ជាក់ថា ស្របពេលជាមួយគ្នានេះ វិបត្តិអត់ឃ្លាននៅហ្គាហ្សានៅតែបន្តធ្ងន់ធ្ងរ ដោយមនុស្ស ៦នាក់ទៀតបានស្លាប់ដោយសារការអត់ឃ្លានក្នុងរយៈពេល ២៤ម៉ោងចុងក្រោយ ដែលធ្វើឲ្យចំនួនអ្នកស្លាប់សរុបដោយសារមូលហេតុនេះកើនឡើងដល់ ១៧៥នាក់ (ក្នុងនោះមានកុមារ ៩៣នាក់)៕