(ព្រុចសែល)៖ អ្នកនាំពាក្យគណៈកម្មការអឺរ៉ុប បានប្រកាសនៅថ្ងៃចន្ទនេះថា សហភាពអឺរ៉ុបនឹងផ្អាកកញ្ចប់វិធានការសងសឹកទាំងពីររបស់ខ្លួន ប្រឆាំងនឹងពន្ធនាំចូលរបស់សហរដ្ឋអាមេរិក រយៈពេល ៦ខែ។ ការសម្រេចចិត្តនេះធ្វើឡើងបន្ទាប់ពីមានកិច្ចព្រមព្រៀងមួយ ជាមួយប្រធានាធិបតីអាមេរិក លោក ដូណាល់ ត្រាំ។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន Reuters។

ទោះជាយ៉ាងណា កិច្ចព្រមព្រៀងនេះនៅតែមានចំណុចមិនទាន់ដោះស្រាយជាច្រើន។ ជាក់ស្តែង អត្រាពន្ធលើគ្រឿងស្រវឹងនៅមិនទាន់ច្បាស់លាស់ ហើយបទបញ្ជាប្រតិបត្តិរបស់លោក ត្រាំ កាលពីសប្តាហ៍មុន ក៏មិនបានផ្តល់ការអនុគ្រោះដោយឡែកសម្រាប់រថយន្ត និងគ្រឿងបន្លាស់ដែរ។ មន្ត្រី EU រំពឹងថា នឹងមានបទបញ្ជាប្រតិបត្តិបន្ថែមទៀតចេញក្នុងពេលឆាប់ៗនេះ ដើម្បីបញ្ជាក់ពីចំណុចទាំងនេះ។

អ្នកនាំពាក្យបានថ្លែងក្នុងសេចក្តីថ្លែងការណ៍មួយថា «សហភាពអឺរ៉ុបបន្តធ្វើការជាមួយសហរដ្ឋអាមេរិក ដើម្បីបញ្ចប់សេចក្តីថ្លែងការណ៍រួមមួយ ដូចដែលបានព្រមព្រៀងគ្នាកាលពីថ្ងៃទី២៧ ខែកក្កដា»។ លោកបានបន្ថែមថា «ដោយមានគោលបំណងទាំងនេះ គណៈកម្មការនឹងចាត់វិធានការចាំបាច់ដើម្បីផ្អាករយៈពេល ៦ខែ នូវវិធានការសងសឹករបស់ EU ប្រឆាំងនឹងសហរដ្ឋអាមេរិក ដែលគ្រោងនឹងចូលជាធរមាននៅថ្ងៃទី៧ ខែសីហា»។

គួរបញ្ជាក់ថា ពន្ធសងសឹករបស់ EU ត្រូវបានបែងចែកជាពីរផ្នែក៖ ផ្នែកមួយគឺដើម្បីឆ្លើយតបទៅនឹងពន្ធរបស់អាមេរិកលើដែកថែប និងអាលុយមីញ៉ូម និងផ្នែកមួយទៀតគឺដើម្បីឆ្លើយតបទៅនឹងពន្ធគោល និងពន្ធលើរថយន្តរបស់លោក ត្រាំ៕