(ប៉េកាំង)៖ អាជ្ញាធរចិនបានជម្លៀសមនុស្សជាង ៨២ ០០០នាក់ នៅទូទាំងរដ្ឋធានីប៉េកាំង នៅចំពោះមុខហានិភ័យនៃភ្លៀងធ្លាក់ខ្លាំង បន្ទាប់ពីមនុស្សរាប់សិបនាក់បានស្លាប់ នៅក្នុងគ្រោះទឹកជំនន់ នៅតាមតំបន់ជាយរដ្ឋធានីនៃប្រទេសចិន កាលពីសប្ដាហ៍មុន។ នេះបើតាមការចេញផ្សាយដោយទីភ្នាក់ងារសារព័ត៌មានចិន Xinhua។

ទីភ្នាក់ងារសារព័ត៌មានចិន Xinhua បានរាយការណ៍ថាមនុស្សរាប់ម៉ឺននាក់ ត្រូវបានជម្លៀសចេញពីតំបន់ងាយរងគ្រោះថ្នាក់ កាលពីម៉ោង៩យប់ ថ្ងៃចន្ទ ទី៤ ខែសីហា។ ព្រមពេលជាមួយគ្នា អាជ្ញាធរចិនក៏បានព្រមានពីហានិភ័យគ្រោះទឹកជំនន់ នៅស្រុក Miyun ដែលរងគ្រោះធ្ងន់ធ្ងរជាងគេដោយសារទឹកជំនន់កាលពីសប្ដាហ៍មុន ព្រមទាំងស្រុក Fangshan Mentougou និងស្រុក Huairou។

គួរបញ្ជាក់ថា គ្រោះទឹកជំនន់នៅជាយភាគខាងជើងនៃរដ្ឋធានីប៉េកាំងបានសម្លាប់មនុស្សយ៉ាងហោច ៤៤នាក់ និង៩នាក់ផ្សេងទៀតបាត់ខ្លួនកាលពីសប្ដាហ៍មុន៕