(BRASILIA)៖ កាលពីថ្ងៃចន្ទសប្តាហ៍នេះ តុលាការកំពូលប្រេស៉ីល បានបង្គាប់ឱ្យអតីតប្រធានាធិបតី លោក Jair Bolsonaro ស្ថិតក្រោមការឃុំខ្លួនក្នុងផ្ទះ នៅមុនសវនាកាត់ក្តី ជុំវិញការចោទប្រកាន់រូបលោក ពីបទមានផែនការធ្វើរដ្ឋប្រហារ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃអង្គារ ទី៥ ខែសីហា ឆ្នាំ ២០២៥។

ចៅក្រមនៃតុលាការកំពូល លោក Alexandre de Moraes ត្រូវបានក្រសួងហិរញ្ញវត្ថុអាមេរិក កំណត់គោលដៅដាក់ទណ្ឌកម្ម កាលពីសប្តាហ៍មុន បន្ទាប់ពីបានចេញដីកាចាប់ខ្លួន លោក Bolsonaro។ លោក Bolsonaro ត្រូវបានហាមមិនឱ្យប្រើប្រាស់ទូរស័ព្ទដៃ ឬទទួលការចូលសួរសុខទុក្ខ លើកលែងតែមេធាវីរបស់គាត់ និងមនុស្សដែលតុលាការអនុញ្ញាតប៉ុណ្ណោះ។

អ្នកនាំពាក្យរបស់ លោក Bolsonaro ទទួលស្គាល់ថា លោកពិតជាត្រូវបានឃុំខ្លួនក្នុងផ្ទះមែន នៅឯគេហដ្ឋានក្នុងទីក្រុង Brasilia ដោយប៉ូលិសបានរឹបអូសយកទូរស័ព្ទដៃរបស់គាត់។ បើតាមមេធាវី ពួកគេនឹងប្តឹងឧទ្ធរណ៍លើការសម្រេចរបស់តុលាការ ដោយលើកហេតុផលថា អតីតប្រធានាធិបតីរូបនេះ មិនបានរំលោភលើដីកាណាមួយឡើយ។

គួរបញ្ជាក់ថា រឿងក្តីលោក Bolsonaro កំពុងស្ថិតក្នុងដៃតុលាការកំពូល ពាក់ព័ន្ធនឹងការចោទប្រកាន់ថា លោកបានគុបគិតជាមួយសម្ព័ន្ធមិត្ត ដើម្បីផ្តួលរំលំការបោះឆ្នោតឆ្នាំ ២០២២ ផ្តួលគូប្រជែងរបស់លោក គឺ លោក Luiz Inacio Lula da Silva ដែលជាប្រធានាធិបតីប្រេស៉ីលបច្ចុប្បន្ន។ ប្រធានាធិបតីអាមេរិក លោក ដូណាល់ ត្រាំ បានហៅករណីនេះថាជាការប្រមាញ់តាមចាប់ ហើយថាសមហេតុផលក្នុងការដាក់ពន្ធ ៥០ភាគរយលើទំនិញប្រេស៉ីល ដែលនឹងចូលជាធរមាននៅថ្ងៃពុធនេះ៕