(ហែលស៉ិនគី)៖ ប្រធានាធិបតីហ្វាំងឡង់ លោក Alexander Stubb បានឱ្យដឹងថា លោកបានជជែកតាមទូរស័ព្ទ ជាមួយប្រធានាធិបតីអាមេរិក លោក ដូណាល់ ត្រាំ ជុំវិញសង្គ្រាមរបស់រុស្ស៉ីនៅអ៊ុយក្រែន ដោយបង្ហាញការគាំទ្រចំពោះកិច្ចខិតខំប្រឹងប្រែងទាំងអស់ ឆ្ពោះទៅរកបទឈប់បាញ់ជាបន្ទាន់។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃអង្គារ ទី៥ ខែសីហា ឆ្នាំ ២០២៥។

តាមសារបង្ហោះលើបណ្តាញសង្គម X កាលពីថ្ងៃចន្ទ លោក Stubb គូសបញ្ជាក់ថា «ពេលវេលាកំណត់របស់ប្រធានាធិបតី ត្រាំ សម្រាប់បទឈប់បាញ់កំពុងខិតជិតមកដល់។ ហ្វាំងឡង់ គាំទ្ររាល់កិច្ចខិតខំប្រឹងប្រែង ឆ្ពោះទៅរកបទឈប់បាញ់ភ្លាមៗ។ ការចរចារយៈពេលវែង ត្រូវតែនាំទៅរកសន្តិភាពយូរអង្វែង និងយុត្តិធម៌»។

គួរបញ្ជាក់ថា លោក ដូណាល់ ត្រាំ ប្រធានាធិបតីអាមេរិក បានគំរាមដាក់ទណ្ឌកម្មថ្មីលើរុស្ស៉ី និងអ្នកទិញប្រេងពីរុស្ស៉ី រួមទាំងឥណ្ឌា និងចិន លុះត្រាតែលោក ពូទីន យល់ព្រមនៅថ្ងៃសុក្រនេះ ថានឹងបញ្ចប់សង្រ្គាមអ៊ុយក្រែន៕