(កៀវ)៖ កាលពីថ្ងៃចន្ទ ទី៤ ខែសីហា ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី បានអះអាងថា កងទ័ពអ៊ុយក្រែននៅភាគឦសានប្រទេស កំពុងប្រយុទ្ធតទល់ជាមួយ ទាហានស៉ីឈ្នួលបរទេសមកពីប្រទេសផ្សេងៗជាច្រើន រួមមានទាំងចិន ប៉ាគីស្ថាន ព្រមទាំងបណ្តាប្រទេសនៅអាស៉ីកណ្តាល និងទី្វបអាហ្រ្វិក។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។

កន្លងមក លោក ហ្សេលេនស្គី ធ្លាប់បានចោទទីក្រុងមូស្គូថា បានកែនអ្នកប្រយុទ្ធជនជាតិចិន ដើម្បីប្រើប្រាស់ក្នុងសង្រ្គាមរបស់ខ្លួននៅអ៊ុយក្រែន ប៉ុន្តែទីក្រុងប៉េកាំង បានទាត់ចោលការចោទប្រកាន់នោះ។ រីឯកូរ៉េខាងជើងវិញ បានបញ្ជូនកងទ័ពសរុបប្រហែលជាង​១ម៉ឺននាក់ ជួយរុស្ស៉ីវាយដណ្តើមយកតំបន់ Kursk ពីកងកម្លាំងរបស់អ៊ុយក្រែន។

តាមរយៈសារបង្ហោះលើបណ្តាញ X ក្រោយធ្វើទស្សនកិច្ចទៅកាន់សមរភូមិមុខ នៅតំបន់ Kharkiv ភាគឦសាន លោក ហ្សេលេនស្គី បាននិយាយយ៉ាងដូច្នេះថា «យើងបានជជែកជាមួយក្រុមមេបញ្ជាការយោធា អំពីស្ថានការណ៍នៅសមរភូមិមុខ គឺអំពីការការពារទីក្រុង Vovchansk អំពីស្ថានភាពនៃសមរភូមិ។ កងទ័ពយើងនៅចំណុចនេះ កំពុងរាយការណ៍មកថា សង្កេតឃើញមានការចូលរួមពីទាហានស៉ីឈ្នួលមកពីចិន តាហ្ស៉ីគីស្ថាន អ៊ូសបេគីស្ថាន ប៉ាគីស្ថាន និងក្រុមប្រទេសអាហ្រ្វិកជាដើម ក្នុងសង្រ្គាមរបស់រុស្ស៉ី។ យើងប្តេជ្ញាថានឹងឆ្លើយតបចំពោះរឿងនេះ»៕